د عامې روغتیا وزارت وايي چې د روغتیا نړیوال سازمان او د ملګرو ملتونو د ماشومانو صندوق یا یونیسف اداره چې ماشومانو ته د پولیو واکسین د پروګرام مسوولیت لري، په سم ډول یې خپل کار نه دی کړی او دغه وزارت ته یې په راپور ورکونه کې لازمه روڼتیا نشته.
د روغتیا وزارت د روغتیايي خدمتونو د وړاندې کولو مرستیال وحید مجروح نن په کابل کې د یوې خبري غونډې پر مهال وویل، هغه څه چې اوس په افغانستان کې د پولیو په اړوند پروګرام کې ترسره کېږي، د روغتیا وزارت او افغان حکومت لپاره د منلو نه دي.
د نوموړي په وینا، سره له دې چې د یونیسف او روغتیا نړیوال سازمان له لوري د پولیو د مخنیوي په برخه کې د پام وړ پیسې لګول کېږي، خو په هېواد کې د ماشومانو د فلج پېښې د اندېښنې وړ دي.
هغه وايي، یوازې په ۲۰۲۰ میلادي کال کې د پولیو ۵۶ مثبتې پېښې په ټول هېواد کې ثبت شوې دي او په وینا یې، په ۲۰۱۹ کال کې یوازې ۲۹ مثبتې پېښې په افغانستان کې ثبت شوې وې.
