د امریکا ولسمشر جو بایډن ویلي، که اسلامي امارت تمه لري چې د مشروعیت ترلاسه کولو په اړه یې غور وشي، باید امریکايي تقاعد شوی سرتېری مارک فریریچز ژر تر ژره له بنده خوشې کړي. نوموړي ټينګار کړی چې امریکايي وګړو او بې ګناه ملکیانو ته امنیتي ګواښونه د منلو نه دي او د دوی برمته کول بزدلانه عمل دی.
د ملګروملتونو سرمنشي انتونیو ګوټرېش وايي چې د افغانستان اقتصاد مخ په ځوړند او د سقوط په درشل کې دی. هغه پر ټویټرپاڼه لیکلي چې د اقتصادي پاشلتیا او د بحران مخنیوي لپاره باید هرڅه ژر دغه هېواد ته نغدې پیسې ورکړل شي.
د لوړو زده کړو وزارت وايي چې د هېواد په ګرم سېرو ولایتونو کې به د دولتي پوهنتونونو تدریسي بهیر د روانې سلواغې میاشتې په ۱۳مه پیل شي. د لوړو زدهکړو وزارت نن په یوه خپره شوې اعلامیه کې ویلي چې د پوهنتونونو له پیل وروسته به محصلانو ته درې اوونۍ درس ورکړل شي او بيا به د وروستي سمسټر ازموینه د کب میاشتې په ۷مه پیل او د همدې میاشتې تر پای پورې به دوام وکړي.
شاوخوا یو کال کېږي چې د تېر حکومت د امنیتي ځواکونو او اسلامي امارت د جګړو له امله د هرات ـ غور ترمنځ د لويې لارې ځینې برخې او د کمینج سیمې پُل ویجاړ شوی او پر یاده لاره تګراتګ هم ستونزمن وو، خو د اسلامي امارت له واکمنېدو وروسته د یادې لارې او پُل د بیارغولو هڅې پیل شوي.
په وروستیو پنځو کلونو کې مخابراتي شرکتونو په کندز ولایت کې د امنیتي ګواښونو له امله د شپې له خوا یې خپل فعالیتونه درولي و، خو هېواد کې د اسلامي امارت په واکمنېدو سره بېرته یې فعالیتونه ۲۴ ساعته شول.
کابل کې یوشمېر متقاعدین وایي، روان کال یې د تقاعد حقوق نهدي ورکړل شوي چې له امله یې ګڼو اقتصادي ستونزو سره مخ دي.
د پاکستان د ملي امنیت سلاکار معید یوسف پرون د یوه پلاوي په مشري کابل ته راغی او له یوشمېر لوړپوړو افغان چارواکو سره یې د دواړو هېوادونو ترمنځ پر سیاسي، اقتصادي، امنیتي او دوه اړخیزو اړیکو او نورو مهمو مسایلو خبرې کړي دي. نوموړي د رییسالوزرا مرستیال عبدالسلام حنفي د بهرنیو چارو سرپرست امیرخان متقي او یوشمېر نورو چارواکو سره لیدلي.
کندوز کې یوه باوري محلي سرچینه سلاموطندار ته وايي چې پرون یوه کس د کورنیو ستونزو له امله خپله مېرمن او خسر وژلي دي. د سرچینې په وینا، دغه کس د کندوز ښار د «ابراهیمخېلو» د کلي اوسېدونکی دی.
د افغانستان بانک عالي شورا غړي شاه محرابي ویلي چې د افغانستان اقتصاد د پاشلتیا په درشل کې دی او امریکا کولای شي چې د پاشلتیا مخه یې ونیسي. نوموړي الجزیرې خبري شبکې ته په یوه استولي لیک کې ټينګار کړی چې افغانستان له یوه سخت ناورین سره مخ دی او د مخنیوي حل لاره یې نیویارک کې ده.
د ملګروملتونو سرمنشي له خپلو اساسي حقونو څخه د افغان ښځو او نجونو محرومه پاتې کېدو څخه اندېښنه ښيي او وايي، اسلامي امارت دې نړیواله ټولنه کې د غړیتوب لپاره دغه حقوق په رسمیت وپېژني. انتونیو ګوترېش پر ټویټر لیکلي، افغانستان کې ښځې او نجونې د ښوونې او روزنې، دندې او برابر عدالت لپاره یو ځل بیا خپلو حقونو څخه محرومیږي.
د فاریاب کوویډ۱۹ روغتون ډاکټرانو نن سهار میمنې ښار کې د معاشونو د نه ورکړې له امله اعتراض کړی او له اړوند ادارو څخه یې غوښتنه کړې چې د دوی معاشونو دې ورکړل شي.
د روسيې د بهرنيو چارو وزارت د اطلاعاتو او مطبوعاتي برخې مرستيال الکسي زايتسف ویلي، روسیه چمتو ده چې د اسلامي امارت او د دوی د مخالفو ترمنځ د خبرو کوربهتوب وکړي. تېره اوونۍ ځينو سرچينو په روسيه کې د اسلامي امارت د جګپوړو استازیو او د ‘مقاومت جبهې’ په نوم د اسلامي امارت مخالفو مشرانو ترمنځ د ليدنو خبر هم ورکړی و.
کابل کې د پاکستان سفیر منصور احمد خان پر خپل ټویټرپاڼه لیکلي چې د پاکستان د ملي امنیت سلاکار معید یوسف نن غرمه کابل ته راغلی دی. منصور احمدخان پر خپل ټویټرپاڼه لیکلي، د پاکستان د ملي امنیت سلاکار د یوه پلاوي په مشري له اسلاماباد څخه کابل ته راغلی او د اسلامي امارت د بهرنیو چارو وزارت له سرپرست سره یې لیدلي دي.
د پاکستان په پنجاب صوبه کې د پابجي «PUBG» ګېم د ډېرې کارونې له امله د دغه ګېم یوه تنکي ځوان کارونکي خپله مور، دوه خویندې او ورور وژلي دي.
د اروپايي ټولنې مرستیال د کابل ښاروالۍ له چارواکو سره د لیدني پرمهال ویلي چې اروپايي ټولنه به په پلازمېنه کابل کې د یو لړ ودانیزو پروژو په برخه کې له کابل ښاروالۍ سره همکاري وکړي. کابل کې د اروپايي ټولنې مرستیال د ودانیزو پروژو په برخه کې د همکارۍ ډاډ ورکړی دی.
د امریکا یوې محکمې د دغه هېواد ولسمشر جو بایډن ادارې ته دوه اوونۍ نور وخت ورکړی چې د افغانستان د کنګل شویو بانکي شتمنیو په اړه پرېکړه وکړي. د دغو رسنیو په وینا، تمه وه چې د امریکا حکومت د افغانستان د دې شتمنۍ په اړه خپلې سپارښتنې پرون دې محکمې ته سپارلې وای.
