اسلامي امارت د ایران د بهرنیو چارو د وزیر حسین امیر عبداللهیان د هغو څرګندونو په غبرګون کې چې ویلي یې و، د هلمند سیند د ډېرو اوبو ترلاسه کولو لپاره له ټولو لاروچارو کار اخیستلی شو وايي، افغانستان د ۱۳۵۱ کال هوکړې ته ژمن دی، خو وروستیو وچکالیو دواړه لوري اغېزمن کړي دي.
د اطلاعاتو او کلتور وزارت ویاند عبدالمتین قانع وايي، د رسنیو په چارو کې د بېلابېلو حکومتي ادارو د لاسوهنې مخنیوي لپاره له امنیتي ادارو، د امر بالمعروف او نهې عنالمنکر او بهرنیو چارو وزارتونو سره هوکړهلیکونه لاسلیکوي. د هغه په خبره، ا.ا هېواد کې د رسنیز فعالیت ملاتړ ته ژمن دی او دغه وزارت د رسنیزو چارو د تنظیم یوازینی ادرس دی.
د روزګان زیاتره سیمې چې پسرلي کې په طبیعي ډول زرغونېږي، د دغه ولایت د اوسېدونکو لپاره د چکر مناسب ځایونه بلل کېږي.
خو د روزګان یوشمېر اوسېدونکي وايي، په دې وروستیو کې وچکالۍ د چکر او مېلو دغه طبیعي ځايونه په بشپړ ډول له منځه وړي دي. دوی غوښتنه کوي چې د چکر د یادو ځايونو د بیارغونې او زرغونتیا لپاره دې کوچني چېکډیمونه جوړ شي.
د غور د امنیې قومانداني د رسنیو څانګې په یوه خبرپاڼه کې ویلي چې یو اووه کلن ماشوم د دغه ولایت په مرکز کې د اوبو یوې ژورې څاه ته لوېدلی او مړ شوی دی.
د ا.ا یوشمېر مخالفې سیاسي څېرې د دویم ځل لپاره نن د اتریش ویانا کې ټول شوي او ټاکل شوې د افغانستان کورنیو مسایلو او د غونډې ګډونوالو ترمنځ د باور پیاوړي کولو پر سر بحث او خبرې وکړي.
دې غونډه کې چې د اتریش د یوه څېړنیز انستیتیوت له لوري جوړېږي، د مخکیني حکومت تر ۳۰ پورې مشران، سیاسي فعالان او دیپلوماتان ګډون کوي.
د کابل د اوومې او اتمې ناحیو اوسېدونکي دغه سیمه کې د کثافاتو له ډېروالي شکایت کوي او وايي چې کابل ښاروالي له یادو سیمو د کثافاتو لېږد او پاککارۍ برخه کې ناغېړي کوي.
د اوومې او اتمې ناحیو د اړوند سیمو اوسېدونکي سلاموطندار ته وايي چې کابل ښاروالي په میاشت کې یو ځل هم له یادې سیمې کثافت نه ټولي.
د اوسپنې ویلېکولو کارخونو د ټولنې مسوولان وايي چې کابل کې د ودانیزو چارو کمېدل لامل شوي چې د اوسپنې ویلېکولو کارخونې هېواد کې د فولادو د تولید کچه کمه کړي.
د اوسپنې ویلېکولو کارخونو د ټولنې اجرایي رییس عبدالنصیر رشتیا سلاموطندار ته وویل چې د فولادو کچې ټیټېدو سره به ګڼشمېر خلک خپلې دندې له لاسه ورکړي.
د هند کرېکټ غوره لیګ کې نن سنرایزر حیدراباد له ډیلي کپېټلز سره لوبه کوي. ټاکل شوې چې دغه سیالي نن ماښام ۶:۳۰ بجې د راجېف ګاندي نړیوال لوبغالي کې ترسره شي.
د پروان محلي مسوولان وايي چې د دغه ولایت په شیخ علي ولسوالي کې د یوې ټرافیکي پېښې له کبله شپږ کسان مړه شوي دي.
د ننګرهار مرکز جلالاباد ښار په بېلابېلو سیمو کې لاهم یوشمېر خلک د سرک پر سر په غیرمعیاري او خپلسري توګه په لاسي کراچیو کې بېلابېل ډوله درمل پلوري.
د سرک پرسر د درملو یوشمېر دغه پلورونکي وايي چې دا یې پلارنی کسب دی او له کلونو راهیسې ورته په میراث پاتې دی.
د فرانسې ولسمشر امانویل ماکرون ویلي چې اوکراین کې به د روسیې د جګړې د پراخېدو او بري مخه نیسي. نوموړي همداراز ژمنه وکړه چې اوکراین کې به د جګړو د پراخېدو مخنیوي لپاره هر کار وکړي.
شازیه هغه مور ده چې دوه ماشومان یې پر شري ناروغۍ اخته شوي او له څو ورځو راهیسې د پروان ۱۰۰بستر تخصصي روغتون کې بستر دي.
نوموړې زیاتوي، د یادې ناروغۍ د مخنیوي لپاره باید ماشومانو ته یې واکسین ورکړل شي. د شازیه په وینا، پر شري ناروغۍ اخته ماشومان لومړی ټوخی کوي او ورپسې اسهالېږي، تبه کوي او وروسته پرې سرې دانې راخېژي.
د روغتیا نړیوال سازمان ویلي چې سوډان کې د واک پر سر د دغه هېواد د پوځ او نیمه ملیشه ډلې «RSF» ترمنځ د نښتو په پایله کې تراوسه ۴۱۳ کسان وژل شوي او څه باندې ۳۵۵۰ کسان ټپیان شوي دي.
د سوریې د بهرنیو چارو وزارت له امریکا غوښتنه کړې چې دغه هېواد کې له ترهګرو او بېلتون غوښتونکو څخه له خپل ملاتړه لاس په سر شي.
د سوریې د بهرنیو چارو وزارت په یوې ویناپاڼه کې ویلي چې دغه هېواد له امریکا غواړي چې د ترهګرو او بېلتون غوښتونکو ډلو ملاتړ پرېږدي او له سوریې څخه دې ژر تر ژره ووځي.
د هند د بهرنیو چارو وزیر ویلي، دغه هېواد د افغانستان په اړه دوحه کې جوړېدونکې ناستې ته په «مثبت» نظر ګوري. ویل کېږي چې دغه ناسته به د راتلونکې مې میاشتې په لومړۍ او دویمه د قطر پلازمېنې دوحه کې د ملګروملتونو د سرمنشي انټونیو ګوټرېش په مشري جوړه شي.
د هند کرېکټ غوره لیګ یا ایپياېل کې نن ورځ او شپه د څلورو پیاوړو لوبډلو ترمنځ دوه لوبې کېږي. په لومړۍ لوبه کې به راجستان رویلز د رویل چلنجر بنګلور او دویمه سیالي کې به چینای سوپر کنګز له کلکته نایټراډرز سره ولوبېږي.
