د امریکا د دفاع وزارت ویاند جان کربي وایي، د تېرو دوو میاشتو په ترڅ کې د افغانستان په بېلابېلو ولایتو کې د وسلهوالو طالبانو له لوري د څو ولسوالیو د مرکزونو له نیولو سره هممهاله پنټاګون د افغانستان د امنیتي وضعیت د ارزونې په حال کې دی او وضعیت ته په کتو به د ځواکونو د وتلو د ورو کېدو پرېکړه وکړي.
طالبانو په تېرو اوو ورځو کې د بلخ اووه ولسوالۍ ونیولې او پرون د مزارشریف ښار دروازو ته په رسېدو سره د ښار د سقوط او د طالبانو دورې ته د ورګرځېدو په اړه د خلکو اندېښنې زیاتې شوې دي.
د مزارشریف ښار په دروازو کې د لنډې مودې لپاره د طالب جنګیالیو حضور لامل شو چې د دغه ښار اوسېدونکي خوندي ځای ته د ځان رسولو په فکر کې شي.
د عطامحمد نور په مشرۍ د اسلامي جمعیت ګوند مشر پرون یوې رابلل شوې غونډه کې د هېواد له سیاسي ګوندونو او پېژندل شویو څېرو وغوښتل چې د طالبانو پر وړاندې دې د هېواد د دفاع لپاره سره راټول شي او ملي خوځښت دې رامنځ ته کړي. هغه وویل چې په دې برخه کې یې لا له وړاندې حکومت ته یوه طرحه وړاندې کړې وه.
د عامې روغتیا وزارت وايي چې په تېرو څلېرویشت ساعتونو کې ۷۳ کسان د کورونا له کبله مړه شوي او دوه زره او ۲۰۲ نور تازه پرې اخته شوي دي. تازه پېښې د پنځه زره او ۴۹۹ شکمنو نمونو له کتلو ترلاسه شوې دي. په تېره یوه شپه او ورځ کې ۴۹۴ نور کسان چې پر کورونا اخته وو، بېرته ښه شوي دي.
د ولسي جرکې غړو د یادې جرګې په نننۍ عمومي غونډه کې وویل چې ولسمشر محمداشرف غني په جګړه نه پوهېږي او همدا موضوع د دې سبب شوې چې امنیتي وضیعت خراب شي.
د روان کال د غبرګولي په ۱۸مه د بدخشان یوشمېر اوسېدونکو د اوبو او برېښنا نهشتون او د ناامنیو زیاتېدو په تړاو اعتراض وکړ، خو دغه اعتراض په تاوتریخوالي واوښت او په پایله کې یې ۴ اعتراض کوونکي ووژل شول او تر ۴۰ زیات ټپیان شول.
سپینې ماڼۍ ویلي چې تمه ده د ولسمشر محمد اشرف غني او د ملي روغې جوړې عالي شورا رییس عبدالله عبدالله د روانې اوونۍ په پای کې امریکا ته سفر وکړي او د دغه هېواد له ولسمشر مشر جوبایډن سره وګوري. د چارو شنونکي د دغو دوو افغان لوړپوړو چارواکو سفر تشریفاتي بولي او وایي چې دغه سفر به د هېواد پر روان وضعیت هېڅ راز اغېز ونه لري.
په دې وروستیو کې د هېواد په کچه د وسلهوالو طالبانو د بریدونو په زیاتېدو سره ځینو ولایتونو کې ولسي کسانو د طالبانو پر ضد وسله پورته کړې او د خپلو سیمو د امنیت ټینګښت لپاره له امنیتي ځواکونو سره اوږه په اوږه ولاړ دي. د کندهار په ارغنداب ولسوالي کې هم د لومړی ځل لپاره د طالبانو پر ضد د ولسي پاڅونوالو سل کسیزه ډله جوړه شوه.
د پروان ولایت په غوربند دره کې د امنیتي ځواکونو پر پوستو د وسلهوالو طالبانو له پراخو بریدونو وروسته، د دغې سیمې لسګونو اوسېدونکو وسله پورته کړې او د امنیتي ځواکونو سره یوځای د طالبانو پر وړاندې د جګړې لپاره د لومړۍ کرښې پر لور روان شوي دي.
د ملي پوځ یوشمېر هغه ځواکونه چې پر کورونا ویروس اخته شوي او د هغوی د کورنۍ غړي وايي، د سردار داوودخان د څلورسوه بستریز روغتون د کورونا د تشخیص په ځانګړې برخه کې په ناعادلانه ډول اکسېجن وېشل کېږي. د دوی په وینا، په دغه روغتون کې د کورونا د تشخیص او درملنې ځانګړې برخه هم پر درېوو بېلابېلو (ويایپي، د جنرالانو او عادي سرتېرو) څانګو وېشل شوې ده.
په داسې حال کې چې هره ورځ د جګړې په ډګر کې د امنیتي ځواکونو د شاتګ او وسلهوالو ته د تجهیزاتو او مهماتو د ور پرېښودو خبرونه خپرېږي، یوشمېر شنونکي وايي، که څه هم افغان ځواکونه تر خپلو وروستیو امکاناتو پورې جګړه کوي او په پای کې له ناچارۍ تسلیمېږي.
د ټول هېواد په کچه د امنیتي وضعیت د خرابېدو او یو پر بل پسې د ولسوالیو د سقوط په دوام، په تېرو۲۴ ساعتونو کې په تخار ولایت کې ۶ ولسوالۍ د طالبانو لاس ته لوېدلي دي. په تخار کې ځايي سرچینې سلاموطندار ته وايي، چال، هزارسموچ، ینګيقلعه، خواجه غار، دشتقلعه او نمکآب ولسوالۍ د دولت له کنټرول څخه وتلي او طالبانو نیولي دي.
د جون میاشتې شلمه د کډوالو له نړیوالې ورځې سره برابره ده، دغه ورځ په ټوله نړۍ کې کډوالو ته د درناوي په موخه د ملګروملتونو سازمان له خوا په دې نوم نومول شوې. د کډوال په نړیواله ورځ د کډوالو له ځواک او زړورتیا څخه چې له ستونزو، نښتو او ځورونې څخه یې د تېښتې لپاره ترسره کوي، نمانځنه کېږي.
په تخار کې یوې سرچینې سلاموطندار ته ویلي چې امنیتي ځواکونو د دغه ولایت ینګيقلعه، چال او هزارسموچ ولسوالۍ پرته له جګړې وسلهوالو طالبانو ته پرېښودلي. سرچینې ویلي چې وسلهوالو طالبانو بېګاه شپه د تخار چال او هزارسموچ ولسوالۍ او نن سهار یې ینګي قلعه ولسوالي تر خپل کنټرول لاندې راوستي دي.
د دایکندي ولایت د پاتوی سیمې اوسېدونکي چې د جګړو له امله د دغه ولایت مرکز نیلي او یوشمېر امن ولسوالیو ته بېځای شوي وایي چې وسلهوالو طالبانو د دغې ولسوالي د سرتګاب سیمې له نیولو وروسته د دوی کورونه په بمونو الوزولي او مړي یې له قبرونو راویستلي دي.
د هېواد په ځینو ولایتونو کې د یوشمېر ولسوالیو د له لاسه وتلو او د جګړې زیاتېدو په کتو، د ځینو ولایتونو د سقوط په اړه هم اندېښنې ډېرې شوې دي.
په ولسي جرګه کې د هلمند د خلکو استازیو نن کابل کې یوې خبري غونډې ته وویل چې دغه ولایت د طالبانو له لوري کلابند شوی او که حکومت یې ژرترژره پر وړاندې اقدام ونه کړي، له لاسه به ووځي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
