په داسې حال کې چې هره ورځ د جګړې په ډګر کې د امنیتي ځواکونو د شاتګ او وسلهوالو ته د تجهیزاتو او مهماتو د ور پرېښودو خبرونه خپرېږي، یوشمېر شنونکي وايي، که څه هم افغان ځواکونه تر خپلو وروستیو امکاناتو پورې جګړه کوي او په پای کې له ناچارۍ تسلیمېږي.
د نظامي چارو شنونکي وايي، د امنیتي ځواکونو د مشرتابه کمزورتیا، د جګړې ناسم مدیریت او د حکومت بېغوري لامل شوې چې امنیتي ځواکونه جګړې ته دوام ور نه کړي او شاتګ ته اړ شي.
د سلاموطندار پښتو فېسبوکپاڼه وڅارئ
د نظامي چارو شنونکی صالح محمد رېګستاني وايي، هغه سرتېري چې اوس یې د وژل کېدو یا تسلیمۍ خبرونه خپرېږي، له کلونو راهیسې پرې ځمکنۍ لارې تړلې وې او هوايي مرستې هم په سختۍ ور رسېدې چې اوس د ډېر فشار له کبله مرګ ته ځان ورکوي او یا هم تسلیمېږي.
- د تخار ینګيقلعه، چال او هزارسموچ ولسوالۍ طالبانو ته پرېښودل شوي
- طالبانو د بامیان پر کهمرد ولسوالي برید کړی
- طالبانو د تخار بهارک ولسوالي په بشپړه توګه نیولې
په همدې حال کې د نظامي چارو یو بل شنونکی وايي، د افغان ځواکونو د تسلیمېدو او دښمن ته د ځینو سیمو پرېښودل، د یادو ځواکونو د انګېزې کمزورتیا او د دښمن د لیکو پیاوړتیا لامل کېږی. د هغه په خبره، د روان وضعیت دوام د امنیتي او دفاعي ځواکونو د مرګژوبلې کچې د زیاتېدو لامل هم کېږي.
د شنونکو په باور، په اوسنیو حساسو شرایطو کې د ادلون او بدلون پر ځای باید د امنیتي ځواکونو لیکې تنظیم او د جګړې روان وضعیت په لاس کې واخیستل شي.
موږ وغوښتل چې په دې اړه د ملي دفاع وزارت نظر هم واخلو، خو بریالي نه شوو.
دا په داسې حال کې ده چې له افغانستانه د بهرنیو ځواکونو د وتلو لړۍ له پیل سره سم، په ځینو ولایتونو کې یوشمېر ولسوالۍ د افغان ځواکونو د شاتګ له کبله د طالبانو لاس ته ورغلي او د هغوی مهمات او تجهیزات یې هم له ځان سره وړي دي.
