د ننګرهار محلي مسوولان وايي چې د دغه ولایت په «دره نور» ولسوالي کې یوه ځوان هلک ځانوژنه کړې ده.
د ننګرهار د امنیې قومنداني ویاند حاجي رییس زابلي سلاموطندار ته ویلي، پېښه پرون دوشنبه د تلې ۱۸مه د دره نور ولسوالي په «قلعه شاهي» سيمه کې رامنځته شوې ده.
زابلي زیاته کړې، ياد هلک چې اتلس کاله عمر لري، د نارنجو په يو باغ کې په یوې ونې ځان راځړولى و.
د ننګرهار د امنیې قومنداني ویاند همداراز د دغه هلک د کورنۍ د غړیو له قوله ویلي چې نوموړي هېڅ روغتیايي ستونزه نه درلوده او ذهني توازن یې برابر و.
تر اوسه د دې پېښې اصلي انګېزه روښانه نه ده او نه هم چارواکو په دې اړه څه ويلي دي.
دا په داسې مهال ده چې له دې وړاندې هم په دغه ولایت او د هېواد په یوشمېر نورو سیمو کې هم د ځانوژنې پېښې ثبت شوي چې لامل یې تر ډېره روغتیايي او اقتصادي ستونزې ښودل شوي دي.
ځو ورځې وړاندې د کندهار په پنجوايي ولسوالي کې هم یوه ځوان ځانوژنه کړې وه او محلي چارواکو ویلي و چې نوموړي عصبي ناروغي درلوده.
