د افغانستان بانک وايي چې له افغانانو سره د نړیوالې ټولنې د بشردوستانه مرستو په دوام، نن د ۴۰ میلیونه نغدو ډالرو یوه کڅوړه کابل ته را ورسېده او یوه سوداګریز بانک ته وسپارل شوه.
د افغانستان بانک پر ټویټر لیکلي چې روانه اوونۍ کې دا د نړیوالې ټولنې د بشردوستانه مرستو دویمه کڅوړه ده چې افغانستان ته را رسېږي.
پرون هم د ۴۰ میلیونه نغدو ډالرو یوه کڅوړه افغانستان ته را ورسېده. د راپورونو پر بنسټ، تراوسه د ۴۰ میلیونه ډالرو نهه کڅوړې افغانستان ته را رسېدلې دي.
د افغانستان بانک د شمېرو له مخې، نړیوالې ټولنې د اسلامي امارت له واکمنېدو راهیسې ټولټال له یو میلیارډ او ۳۱۳ میلیونه ډالرو نه ډېرې نغدې پیسې افغانستان ته را لېږلې دي.
د سلاموطندار پښتو فېسبوکپاڼه وڅارئ
د افغانستان بانک د نړیوالې ټولنې د بشردوستانه مرستو د ستاینې ترڅنګ، هېواد ته له قانوني او اصولي لارو د اسعارو را لېږدولو هرکلی هم کړی دی. دغه بانک له نړیوالې ټولنې غوښتي چې خپلې مرستې د بانکي سکټور له لارې وکړي.
