د سلاموطندار رسنیزې شبکې خبریال رومان کریمي او موټر چلوونکی سمیعالله چې نن شاوخوا لس بجې د کابل نوي ښار حاجي یعقوب څلور لارې ته د ښځو د یوه اعتراضیه لاریون د خبري پوښښ په موخه ورغلي وو، د اسلامي امارت د استخباراتو لهخوا نیول شوي او د اوو ساعتونو لپاره په بند کې وو.
کریمي وایي چې دی او سمیعالله د کابل د لسمې حوزې په استخباراتو امریت کې د اوو ساعتونو لپاره په بند کې وو چې مازدیګر پنځه بجې بېرته خوشې شول.
د سلاموطندار خبریال رومان کریمي زیاتوي، سره له دې چې د اسلامي امارت استخباراتي ځواکونو ته یې د خبریالۍ کارت هم ښودلی، خو بیا هم خبرو ته یې چا پام نه دی کړی، نیول شوی او وهل ټکول شوی دی.
رومان کریمي وایي: «کله چې یې ونیولم، د ټرافیکو غرفې ته یې بوتلم او مبایل یې راڅخه واخیست. راته یې وویل چې د مبایل کوډ خلاص کړه، ما ورته وویل چې مبایل کې زما شخصي فایلونه دي، ناڅاپه یې په څپېړه ووهلم.»
رومان کریمي همداراز وايي چې له نیول کېدو وروسته د اسلامي امارت ځواکونو د ده په مبایل کې ټول شخصي فایلونه او ټولنیزې شبکې کتلي دي.
د کریمي په وینا، د کابل د لسمې حوزې استخباراتي مسوولانو له هغه څخه غوښتي چې له دې وروسته په دغه ډول اعتراضیه غونډو کې ګډون ونه کړي. نوموړی وايي چې د اسلامي امارت د استخباراتو ځواکونو د نیویارک ټایمز تصویر اخیستونکی فرزاد هم نیولی و او له دوی سره یوځای یې بېرته خوشې کړ.
په همدې حال کې د سلاموطندار د خبر څانګې مدیر ګلمحمد ګران وايي چې اسلامي امارت د خبریالانو د امنیت د ټینګښت مسوولیت لري او خبریالانو ته باید د هر ډول اعتراضیه غونډو د پوښښ زمینه برابره کړي.
د ګران په وینا، د اسلامي امارت د استخباراتي ځواکونو لهخوا د خبریالانو له لوري د اعتراضیه غونډو د پوښښ مخنیوی، د رسنیو پر کار منفي اغېز کوي او اسلامي امارت باید د خبریالانو د نیولو پرځای، اطلاعاتو ته د لاسرسي زمینه برابره کړي.
په همدې حال کې د ژورنالېستانو د فدراسیون غړی سیدعلي اکبرزاده وايي چې حکومت باید د خبریالانو د امنیت ټینګښت په برخه کې جدي هڅې وکړي او په دې برخه کې خپلې کړې ژمنې عملي کړي.
د سلاموطندار پښتو فېسبوکپاڼه وڅارئ
دا په داسې حال کې ده چې نن یوځل بیا یوشمېر ښځو په کابل کې اعتراض وکړ او د «ډوډۍ، کار او ازادۍ» شعارونه يي ورکول. اعتراض کوونکو د بېوزلۍ د زیاتېدو او پر ښځو د محدویدتونو د دوام په غبرګون کې اعتراض کړی و.
ټاکل شوې وه دغه اعتراض د کابل نوي ښار په «حاجي یعقوب» څلور لارې کې وشي، خو د اسلامي امارت ځواکونو یې مخه ونیوله. یوشمېر ښځې وايي چې د اعتراض پرمهال ګواښل شوي او د پرېکړهلیک د لوستلو اجازه هم نهده ورکړل شوې.
د یادونې وړ ده چې له دې وړاندې هم د اسلامي امارت استخباراتي ځواکونو د سلاموطندار په ګډون د یوشمېر نورو رسنیو خبریالان نیولي، وهلي او ټکولي هم دي.
