د ناپېژنده وسلهوالو له لوري د غور غږ راډیو د مسوول مدیر بسمالله عادل ایماق د کورنۍ درې غړیو وژل کېدو پراخ غبرګونونه را پارولي دي. د افغان خبریالانو د خوندیتوب کمېټې او د افغانستان د ازادو رسنیو د ملاتړ ټولنې یا نی د دې پېښې د څېړلو غوښتنه کړې ده.
د افغان خبریالانو د خوندیتوب کمېټې د بسمالله عادل د کورنۍ پر غړیو د ناپېژنده وسلهوالو برید غندلی او له امنیتي ادارو یې غوښتي چې دا پېښه په بشپړه توګه وڅېړي، عاملان یې ونیسي او سزا ورکړي.
د دغې کمېټې په خبرپاڼه کې له حکومت نه غوښتل شوي چې د ایماق د کورنۍ غړي وساتي. د خبرپاڼې له مخې، ناپېژنده وسلهوالو د غور د مرکز فېروزکوه ښار په «تد غه تیمور» سیمه کې د بسمالله عادل د کورنۍ درې غړي وژلي او ۵ نور ټپیان شوي دي.
د افغان خبریالانو د خوندیتوب کمېټې د دغه برید د عاملانو او انګېزې په اړه څه نه دي ویلي، خو د بسمالله عادل ورور حیاتالله عادل چې د غور د پولیسو دویمې امنیتي حوزې امر هم دی، سلاموطندار ته ویلي چې طالبانو یې بېګاه پر کور برید کړی دی. د نوموړي په وینا، په برید کې یې یو ورور، یو د کاکا زوی او یوه هم ورېره وژل شوي او ۵ کسان ټپیان شوي دي.
خو طالبانو په دغه برید کې خپل لاس لرل رد کړي دي. د دې ډلې ویاند یوسف احمدي وايي چې یاد برید دوی نه دی کړی.
د افغان خبریالانو د خوندیتوب کمېټه وايي، حکومت، په ځانګړي ډول امنیتي ادارې باید د ایماق او د هغه د کورنۍ غړیو د وژل کېدو په په اړه معلومات وړاندې کړي. دغې کمېټې د افغان خبریالانو او د هغو د کورنۍ غړیو د امنیت او خوندیتوب په اړه سخته اندېښنه ښودلې ده.
د دې کمېټې په وینا، د خبریالانو د هدفي وژنو لړۍ چې د تېر میلادي کال په نومبر میاشت کې پیل شوې، نه یوازې د خبریالانو امنیت او ژوند ګواښلی، بلکې د اغېزناکه خبرونو او نورو رسنیزو فعالیتونو د محتوا د تولید په برخه کې یې د خبریالانو او رسنیو پر وړتیا منفي اغېز کړی دی.
د افغانستان د ازادو رسنیو د ملاتړ ټولنې یا نی هم د بسمالله عادل د کورنۍ درې غړیو د وژلو پېښې د څېړنې غوښتنه کړې ده.
نی په یوه خبرپاڼه کې لیکلي چې د بسمالله عادل د پلار پر کور وسلهوال برید کې د یادې کورنۍ درې غړي وژل شوي دي. نی د راپورونو پر بنسټ زیاته کړې چې وسلهوالو په دغه برید کې د عادل د کورنۍ دوه غړي له ځانه سره هم بیولي دي.
د افغانستان د ازادو رسنیو د ملاتړ ادارې هم له امنیتي ادارو غوښتي چې یاده پېښه وڅېړي او قاتلان یې د قانون منګولو ته وسپاري.
نی دغه راز، له حکومت نه غوښتي، څو روښانه کړي چې ایا د عادل ایماق پر کور برید د هغه له رسنیزو فعالیتونو سره تړاو درلود، که نه.
په افغانستان کې د ناټو قومانداني هم په یوه ټویټ کې دغه برید غندلی او د ورته پېښو د درېدو غوښتنه یې کړې ده.
ناټو لیکلي: «په غور کې د خبریال او مدني فعال بسمالله عادل ایماق له وژل کېدو دوه میاشتې وروسته، خبر شو چې د کورنۍ غړي یې هم په نښه شوي دي. اوس د افغانستان د ازادو رسنیو رول له بل هر وخته مهم دی. دغه بریدونه باید ودرول شي!»
د غور غږ راډیو مدیر مسوول بسمالله عادل ایماق نږدې دوه میاشتې وړاندې د ناپېژنده وسلهوالو له لوري د دغه ولایت په مرکز فېروزکوه ښار کې ترور شو.
د ملي امنیت عمومي ریاست د نوموړي له وژل کېدو څو ورځې وروسته وویل چې د غور د ولایتي شورا غړي عزتالله بېګ د هغه په ترور کې لاس درلود. امنیتي ځواکونو غوښتل عزتالله بېګ ونیسي، خو کله یې چې هغه پر وړاندې وسلهوال غبرګون وښود، ځانګړو ځواکونو په نښه او وواژه.
