د پاکستان د سند ایالت د جمشورو ولسوالي په منجهنډ سیمه کې د یوې ټرافیکي پېښې پرمهال یوولس کسان مړه شوي او ۱۳ ټپیان دي.
د پاکستان ډان ورځپاڼې نن پنجشنبه د تلې ۱۴مه راپور ورکړی چې د سند ایالت د منجهنډ سیمې پر لویه لاره د یوه بس او باروړونکي موټر د ټکر له امله دغه مرګژوبله رامنځته شوې ده.
سیمه کې پولیسو ویلی چې په مړو شویو کې دوه ماشومان، درې ښځې او شپږ نارینه شامل دي. په ورته مهال د پېښې ټپیان د جمشورو ولسوالي روغتون ته لېږدول شوي او تر درملنې لاندې دي.
تراوسه د یادې ټرافیکي پېښې د لامل په اړه څه نه دي ویل شوي. له دې وړاندې هم په دغه هېواد کې د ټرافیکي پېښو له امله خلکو ته مرګژوبله اوښتې ده.
د روانې اوونۍ د سهشنبې پر ورځ په خېبرپښتونخوا کې هم د افغان کوچیانو د یوه ټراکټور او باروړونکي موټر د ټکر له امله یوولس افغانان مړه او ۳۳ نور ټپیان شوي وي.
دغه پېښه د بلوچستان سره نږدې د خېبرپښتونخوا ایالت په ډېره اسماعیلخان سیمه کې رامنځته شوې وه.
