د افغانستان په سوېل ختیځ ولایتونو پکتیکا، خوست او پکتیا کې له زلزله ځپلو سره د مرستو په لړ کې امریکا له دغو زلزله ځپلو سره د ۵۵ میلیونه ډالرو په ارزښټ د بېړنۍ بشريمرستې اعلان وکړ.
د امریکا د بهرنیو چارو وزارت په یوې خبرپاڼه کې ویلي چې دغه مرسته د زلزلې له پېښېدو وروسته د ولسمشر جو بایډن له لوري د بېړنیو اړتیاوو له ارزونې وروسته اعلان شوې ده.
د سلاموطندار پښتو فېسبوکپاڼه وڅارئ
په همدې حال کې د امریکا د بهرنیو چارو وزارت خبرپاڼه زیاتوي چې دغه پیسې به د امریکا د نړیوالې پراختیایي ادارې له لارې، هغو کسانو ته ورکول کېږي چې وروستۍ طبیعي پېښه کې تر ټولو زیات زیانمن شوي دي.
د ورکړل شویو شمېرو له مخې، په سوېل ختیځ ولایتونو کې د شوې زلزلې له امله څه باندې ۱۰۰۰ کسان مړه شوي او په سلګونه کسان ټپیان شوي دي.
د سره صلیب نړیوالې کمېټې په خپل یوه تازه راپور کې ویلي چې په سوېل ختیځ پکتیکا، خوست او پکتیا ولایتونو کې د شوې زلزلې له کبله ۲۰۰زره کسان زیانمن شوي دي.
د سره صلیب د نړیوالې کمېټې په راپور کې همداراز راغلي و چې په دغه زلزله کې ۶۰زره کورنۍ زیانمنې شوي او ۴۰سلنه ماشومانو ته هم زیان رسېدلی دی.
د یادونې وړ ده چې تر امریکا وړاندې چین، هند، پاکستان، ایران او ځینو عرب هېوادونو هم افغانستان کې د وروستۍ زلزلې زیانمنو ته مرستې لېږلې دي.
خو د زلزله ځپلو سیمو اوسېدونکي وايي چې شوې مرستې ورته بسنه نه کوي او باید له دې ډېرې مرستې ورسره وشي.
