ولسي جرګې د امنیت خرابوالي او د امنیتي ځواکونو پر پوستو د وسلهوالو طالبانو پر بریدونو اندېښنه څرګنده کړې ده. د ولسي جرګې غړیو د دې جرګې په نننۍ عمومي ناسته کې وویل، د ناامنیو زیاتوالی او د وسلهوالو طالبانو د بریدونو زور اخیستل د هېواد امنیتي وضعیت د خرابوالي لپاره د خطر زنګ دی او دا د دې ښکارندویي کوي چې امنیتي او دفاعي ادارې د هېواد امنیتي وضعیت د ښهوالي لپاره کوم پلان نه لري.
په ولسي جرګه کې د بغلان د خلکو استازی مامور احمدزی وایي، تېره شپه په بغلان ولایت کې د امنیتي ځواکونو پر پوسته د وسلهوالو طالبانو برید کې ۱۳ امنیتي سرتېري وژل شوي او ۱۲ نور ټپیان دي. د نوموړي په وینا، وسلهوالو طالبانو د دې پوستې ۲۸ نور سرتېري له ځان سره بيولي او د دې پوستې ګڼشمېر تجهیزاتو ته یې اور اچولی دی.
د سلاموطندار پښتو فېسبوکپاڼه وڅارئ
په دې ناسته کې د بدخشان د خلکو استازی عبدالولي نیازی وایي، هغه تګلاره چې امنیتي ځواکونو د جګړې په ډګر کې غوره کړې، ګټوره نه ده او یوازې د وضعیت په خرابوالي کې مرسته کوي. د هغه په خبره، د تاوتریخوالي ډېروالی، د جګړې له امله درانه تلفات او هدفي وژنې د اندېښنې وړ دي او که جګړه ځپلو سیمو ته پام ونه شي، تاوتریخوالی به لا پسې پراخ شي.
- د بهرنیو ځواکونو د وتلو پیل؛ په ۵ ورځو کې ۵۸ ملکیان او نظامیان وژل شوي
- په افغانستان کې له ترهګرۍ سره پر ګډې مبارزې د ملګرو ملتونو ټينګار
- فراه کې د ملي اردو یوې پوستې سقوط؛ لږترلږه ۳۰ کسان وژل شوي
د ولسي جرګې یوشمېر نور غړي بیا وایي، نامسووله وسلهوال د امنیتي وضعیت په خرابوالي کې لاس لري او د دوی ناقانوني فعالیتونو امنیتي ځواکونه کمزوري کړي دي.
یوشمېر نور هم پر دې بارو دي چې د محلي مسوولانو ناغېړي او په ولایتونو کې ناسمې ګومارنې د دې لامل شوي چې امنیتي وضعیت د خرابوالي پر لوري ولاړ شي.
د امنیتي وضعیت پر خرابوالي د ولسي جرګې د غړیو نیوکې د دې لامل شوي چې امنیتي مسوولان دې جرګې ته د استجواب لپاره ور وغواړي. یاده غونډه نن په ولسي جرګه کې د تړلو دروازو شا ته ته جوړه شوه.
