د اسلامي امارت چارواکي وايي، د افغانستان، ایران، ملګرو ملتونو او پاکستان څلوراړخیزه غونډه چې پنځه ورځې به دوام وکړي، سبا په تهران کې پیلېږي.
دا غونډه د ناقانونه کډوالو د ستونزو حل او په خپله خوښه هېواد ته د هغوی راستنولو په موخه جوړېږي.
د اسلامي امارت د کډوالو او بېرته راستنېدونکو چارو وزارت مسلکي مرستیال عبدالرحمان راشد وايي، د دې غونډې موخه په یادو هېوادونو کې د افغان کډوالو د ستونزو حل او په خپله خوښه یې د بېرته را ګرځېدو لپاره د شونتیا څېړل دي.
د کډوالو او بېرته راستنېدونکو چارو وزارت مسوولان ډاډ ورکوي، د هغو کډوالو کډوالو لپاره به د اوسېدو ځای او کاري فرصتونه هم برابر کړي چې په خپله خوښه بېرته هېواد ته را ستنېږي.
د سلاموطندار پښتو فېسبوکپاڼه وڅارئ
د دغه وزارت د شمېرو له مخې، اوس شپږنیم میلیونه افغان کډوال چې یوشمېر هغه یې له فزیکي او اروايي تاوتریخوالي سره مخ دي، په ایران او پاکستان کې اوسېږي.
