د روغتیا نړیوال سازمان خبرداری ورکړی چې د کانګو ډیموکراتیک جمهوریت کې د ایبولا ناروغۍ د خپرېدو خطر ډېر لوړ شوی دی. د دې سازمان مشر تدروس ادهانوم ګبریسوس ویلي، که څه هم په سیمه کې وضعیت د اندېښنې وړ دی، خو د نړۍ په کچه د دې ناروغۍ خطر لاهم ټیټ ګڼل کېږي.
د روغتیا نړیوال سازمان اعلان کړی چې د کانګو ډیموکراتیک جمهوریت لپاره یې د ایبولا ناروغۍ د عامې روغتیا خطر له «لوړ» څخه «ډېر لوړ» ته پورته کړی دی.
د سازمان د معلوماتو له مخې، تراوسه په دغه هېواد کې د ایبولا ۸۲ مثبتې پېښې ثبت شوې او اووه کسان د دې ناروغۍ له امله مړه شوي دي.
تدروس ادهانوم ګبریسوس ویلي، ښايي د ناروغۍ اصلي کچه تر دې هم پراخه وي، ځکه شاوخوا ۷۵۰ شکمنې پېښې او ۱۷۷ شکمن مړینې هم راپور شوې دي.
هغه زیاته کړه چې نړیوال خطر اوس هم ټیټ دی، خو روغتیايي ادارې د ناروغۍ د لا پراخېدو د مخنیوي لپاره جدي څارنه کوي.
دا نوې خپرېدونکې ناروغي د «بونډیبوګیو» په نوم د ایبولا د یوه نادر ویروس له امله رامنځته شوې چې تراوسه ورته تایید شوی واکسین نهدی موندل شوی.
راپورونه وایي چې دا ویروس ګاونډي هېواد یوګانډا ته هم رسېدلی، چې هلته دوه مثبتې پېښې او یو مړینه ثبت شوې ده.