که څه هم پاکستان د ا.ا له واکمنېدو راهیسې له افغانستان سره خپلو اړیکو ته دوام ورکړی، خو دا اړیکې د دواړو لوریو د چارواکو له اختلافونو او لفظي شخړو سره مخامخ شوې دي.
تازه د پاکستان د پوځ لوی درستیز عاصم منیر پر ا.ا نیوکې کړي او ویلي یې دي چې د یوه پاکستاني د ژوند ارزښت له ټول افغانستان څخه زیات دی. دغه لوړپوړي پاکستاني چارواکي خبرداری ورکړی، هغه کسان به وڅاري چې په افغانستان کې د پاکستان د امنیت پر ضد کار کوي.
د سلاموطندار پښتو فېسبوکپاڼه وڅارئ
خو دغو څرګندونو د ا.ا د پوځ د لوی درستیز فصیحالدین فطرت غبرګون را پارولی دی. د دفاع وزارت ویاند عنایتالله خوارزمي د هغه له خولې لیکلي چې پاکستان د خپلې ناکارۍ پړه پر نورو وراچوي.
د اسلامي امارت د لوی درستیز د وینا په یوه برخه کې راغلي: «دا چې ښاغلي منیر د خپل هېواد د یوه وګړي خوندیتوب د افغانستان د ټولو خلکو له ژوند څخه مهم بولي، دا د یوه مسلمان ملت د ارزښتونو سپکاوی دی. دا چې دوی نهشي کولای د خپل هېواد امنیت ټینګ کړي، د خپلو نیمګړتیاوو پړه پر نورو وراچوي. د پاکستان خلک باید د دغو څرګندونو پر وړاندې غبرګون وښيي.»
په ورته وخت کې د سیاسي او امنیتي چارو یوشمېر کارپوهان دا ډول څرګندونې او لفظي شخړې د دواړو هېوادونو ترمنځ د اړیکو خرابېدو لامل بولي. د امنیتي او سیاسي چارو کارپوه عزیز ستانکزی وايي، دا ډول لفظي شخړې به په اوسني وضعیت کې پاکستان ته سخت زیان ورسوي.
هغه په دې اړه سلاموطندار ته ویلي: «پاکستاني چارواکي باید د لوی درستیز غوندې لیدلوری ونه لري؛ ځکه اړیکې خرابوي. افغانستان تل د خپلو ګاونډیانو په اړه له کومې موخې او د لاسوهنې له ارادې پرته لیدلوری خپل کړی، خو پاکستان تل له واقعیت پرته او د لاسوهنې لپاره څرګندونې کړي او دا کولای شي ناورین نور هم پراخ کړي.»
په تېرو دوو کلونو کې تمه کېده چې د افغانستان او پاکستان د حکومتونو ترمنځ به اړیکې ښې شي، خو دا اړیکې تر لفظي شخړو او ان سختو اختلافونو پورې رسېدلې دي.
بلهخوا د سیاسي چارو کارپوهان صادق شینواری او عبدالقادر قانت وايي:
«پاکستان تل د افغانستان په اړه استخباراتي او دوهمخی سیاست لوبولی چې بېرته یې پر همدغه هېواد منفي اغېز کړی دی. اوس د دغه وضعیت په توجیه کولو سره غواړي د افغانستان له لارې د مرکزي اسیا امنیت خراب کړي او د داعش غوندې ډلو په کارولو سره هڅه کوي چې په افغانستان کې د لوېدیځو هېوادونو استخباراتي ګټي خوندي کړي.»
« تر هغه چې په افغانستان کې د پاکستان ګټې خوندي نه وي، د دواړو هېوادونو اړیکې نه ښې کېږي؛ ځکه چې پاکستان تل له افغانستان څخه ناسمې غوښتنې کوي.»
دا په داسې حال کې ده چې ګارډین ورځپاڼې په دې وروستیو کې د خپلو سرچینو له قوله لیکلي، پاکستان هڅه کوي افغانستان ته د داعش وسلهوال واستوي او د افغانستان د سرپرست حکومت پر ضد یې وکاروي.
