د هرات د امنیې قومنداني د رسنیو دفتر په یوې خبرپاڼه کې ویلي چې دغه ولایت کې د داعش ډلې پر یوه پټنځای د عملیاتو پر مهال د یوې ښځې په ګډون د یادې ډلې شپږ غړي وژل شوي دي.
په خبرپاڼه کې راغلي چې دغه عملیات بېګاه ۱۰بجې د هرات ښار د څوارلسمې ناحیې اړوند «رباط کابليها» سیمه کې شوي دي.
په ورته مهال د هرات د امنیې قومنداني د رسنیو دفتر په خپرپاڼه کې همداراز ویل شوي چې دې عملیاتو کې د اسلامي امارت یو غړی هم ټپي شوی دی.
خبرپاڼه کاږي چې د عملیاتو پر مهال له یادو کسانو څخه درې میله کلاشینکوف، پنځه میله توپانچې، یو دوربین او ۱۵ موبایلونه هم ترلاسه شوي دي.
سلاموطندار پر ټوېټرپاڼه هم وڅارئ
دا په داسې مهال دی چې له دې وړاندې هم د اسلامي امارت ځواکونو کابل کې د داعش ډلې پر یوه پټنځای عملیات کړی و چې پر مهال یې دوه داعشیان وژل شوي وو.
