د افغانستان د ژورنالستانو ټولنې د رسنیو مسوول مسرور لطفي د امر بالمعرف او نهې عن المنکر وزارت له لوري د رسنیو پر وړاندې د نوې کړنلارې د خپرېدو په غبرګون کې ویلي، اسلامي امارت غواړي رسنۍ محدودې کړي.
لطفي سلاموطندار سره د خبرو پرمهال وویل، دغه ډول محدودیت او فشار د رسنیو په خپرنیز پوښښ منفي اغېز کوي او رسنیزه ټولنه د له منځه تلو له ګواښ سره مخ کوي.
د سلاموطندار پښتو فېسبوکپاڼه وڅارئ
د ژورنالیستانو ټولنې د رسنیو مسوول وايي، په داسې حال کې چې د رسنیو پر وړاندې مناسبه حقوقي کړنلاره شتون نه لري، پر رسنیو فشار، د بیان ازادۍ ته زیان رسوي.
د رسنیو د ملاتړو بنسټونو د غبرګون ترڅنګ، د ټولنیزو رسنیو یوشمېر کارونکو هم د اسلامي امارت له نوې اعلان شوې کړنلارې څخه اندېښنه ښودلې.
د ټولنیزو شبکو کارونکي وايي، په داسې حال کې چې د هرې ورځې په تېرېدو وضعیت نور هم خرابېږي، خو اسلامي امارت د ستونزې د حل پر ځای، رسنۍ تر موخې لاندې راوستي.
د اسلامي امارت د امر بالمعروف او نهې عنالمنکر وزارت اته مادهییز دستورالعمل کې له رسنیو غوښتل شوي چې ښځینه خبریالانې باید اسلامي حجاب مراعت کړي او ښځې دې د ټلویزیون تمثیلي خپرونو او فلمونو کې حضور څخه ډډه وکړي.
په ورته مهال د اسلامي شریعت خلاف بهرني سریالونه دې نه خپرېږي او رسنۍ دې هغه خپرونې نه خپروي چې دین او انساني کرامت ته په کې سپکاوی کېږي.
په دغه دستورالعمل کې د هغو سریالونو او پروګرامونو خپرېدل هم ممنوع اعلان شوي چې د انبیا او صحابو رول په کې تمثیل شوی وي.
