د سریلانکا د کرېکټ ملي لوبډلې په خپل کوربهتوب د افغانستان کرېکټ ملي لوبډلې څخه د درېوو یو ورځنیو سیالیو لوبلړۍ ۲-۱ وګټله.
افغانستان د یادې لوبلړۍ په لومړۍ لوبه کې سریلانکا ته ماته ورکړې وه، خو په وروستیو دوو سیالیو کې بیا سریلانکا د ښکلو لوبو پرمټ افغانستان ته ماته ورکړه.
د سلاموطندار پښتو فېسبوکپاڼه وڅارئ
د افغانستان لوبډله په وروستۍ او درېیمه لوبه کې د سریلانکا د توپاچوونکو پر وړاندې په بشپړه توګه پاتې راغله او ټولې لوبډلې د ۲۲.۲ اورونو په لوبولو سره ۱۱۶ منډې جوړې کړې.
د سریلانکا د کرېکټ ملي لوبډلې دغه هدف د یوه لوبغاړي په سوځېدو په ۱۶ اورونو کې ترلاسه کړ او ورسره یې د درېوو سیالیو لوبلړۍ هم وګټله.
د سریلانکا لپاره په توپوهنه کې ډیموټ کرونارتني ناسوځېدلې ۵۶ او پاتوم نېسنکا ۵۱ منډې جوړې کړې. د سریلانکا توپاچوونکو هم ښکلې لوبه وکړه چې ډېشمونتا چمیرا څلور او وننډو هسرنګا بیا د ۷ منډو په بدل کې درې وېکټې ترلاسه کړې.
د افغانستان د کرېکټ ملي لوبډلې یوه لوبغاړي هم له ۲۳ منډې زیاتې منډې جوړې نه کړې. محمدنبي تر ټولو زیاتې ۲۳، ابراهیم ځدراڼ ۲۲ او ګلبدین نایب بیا ۲۰ منډې جوړې کړې.