د امريکا دفاع وزارت خبرداری ورکړی، که چېرې د افغانستان د هوايي ځواک سلاکاران له دې هېواده ووځي، نو دوی به و نه شي کړای په اغېزمنه توګه مبارزه وکړي.
په افغانستان کې د امريکا د نظامي عملياتو پلټې ادارې تازه راپور چې د ياد هېواد کانګرېس ته يې وړاندې کړی ښيي، که چېرې د دوحې د هوکړې پر بنسټ له درېیو میاشتو څخه لږه موده کې د افغانستان هوايي ځواک بهرني نظامي سلاکاران دا هېواد پرېږدي، دوی به ونهشي کولای د طالبانو پر وړاندې په مبارزه کې د ځمکي ځواک ملاتړ وکړي.
د راپور پر بنسټ، د بهرنيو نظامي سلاکارانو کمښت سره به د افغانستان هوايي ځواک په بشپړه توګه فلج شي.
په دې راپور کې راغلي، اوس مهال د الوتکو د ساتنې مسووليت له امريکايانو سره دی.
په ياد راپور کې همداراز خبرداری ورکړل شوی، هر کله چې دغه مسووليت افغانانو ته ورکړل شي، دوی به حتا څو مياشتې هم د الوتکو ساتلو ظرفیت ونه لري.
راپور کې همداراز راغلي، تراوسه پورې ۹۴ سلنه د هوايي ځواک بهرنيو نظامي سلاکارانو افغانستان ترک کړی دی.
د شمېرو له مخې، په تېر يوه کال کې د افغان دولت د هوايي ځواک ۵ الوتکې له منځه تللي، يوه الوتکه ويجاړه شوې او د دې ځواکونو یو شمېر نورې الوتکې تر بيارغولو لاندې دي.
