د کونړ ځايي چارواکي وايي، پاکستاني ځواکونو تېره شپه شلتن ولسوالي کې پر استوګنیزو سیمو توپچي بریدونه کړي، چې د ښځو او ماشومانو په ګډون یې ملکي کسانو ته تلفات اړولي دي.
د کونړ د اطلاعاتو او کلتور رییس قاري نجيبالله حنیف سلاموطندار ته وويل، پاکستاني ځواکونو له تېرو دریو ورځو راهيسې د کونړ شلتن، مرورې او ناړۍ ولسوالیو توپچي بريدونو کړي.
هغه وویل، د پاکستاني ځواکونو دغو بریدونو کې تېره شپه استوګنيزې سيمې په نښه شوي چې د ښځو او ماشومانو په ګډون ۵ کسان په کې وژل شوي دي. دغو توپچي بریدونو کې یو کس ټپي شوی هم دی.
د سلاموطندار پښتو فېسبوکپاڼه وڅارئ
د کونړ د اطلاعاتو او کلتور رییس وايي، ولایتي ادارې موضوع له لوړ پوړو چارواکو سره شريکه کړې او د حل لپاره يې هڅه کېږي .
پاکستان کلونو راهیسې د هېواد پر سرحدي سیمو په ځانګړې توګه د کونړ پر يو شمېر ولسواليو توغنديز بريدونه کوي، چې ډېر کله مالي او ځاني زیانونه له ځان سره لري.
