د کونړ د والي ویاند غني مصمم وايي، تېرو ۲۴ ساعتونو کې د پاکستاني پوځیانو له لوري یوځل بیا د کونړ په مرورې ولسوالۍ ۱۶ د هاوان مرمۍ توغول شوي چې له کبله یې یوه ماشومه وژل شوې او د کورنۍ ۴ غړي یې ټپیان شوي دي.
ټپيانو کې د وژل شوې ماشومې مور او درې نور ماشومان شامل دي.
دغه مرمۍ د مرورې ولسوالۍ په بېلابېلو سیمو وار شوي، خو مرګژوبله یې یوازې «ترخو اوبو» سیمه کې اړولې ده.
پر کونړ او یو شمېر نورو ولایتونو د پاکستان راکیټي بریدونه له تېرو شاوخوا ۱۲ کلونو راهیسې روان دي، خو حکومت تر اوسه په دې اړه غوڅ دریځ نه دی غوره کړی.
