د بهرنیو چارو وزارت سیاسي مرستیال شېرمحمد عباس ستانکزي نن کابل کې د «ګرځندوی نړیوالې ورځې» په نمانځغونډه کې وویل چې پاکستان له امریکا څخه د افغانستان پر فضا د هرې ګرځېدونکې بېپېلوټه الوتکې په بدل کې میلیونونه ډالر اخلي.
عباس ستانکزي نن (سهشنبه، تلې پنځمه) دې نمانځغونډه کې همداراز وویل، پاکستان د خپل هوايي حریم له لارې امریکايي بېپېلوټه الوتکو ته اجازه ورکوي، څو د افغانستان پر فضا څار وکړي او په وینا یې، پاکستان له دې درکه امریکا څخه میلیونونه ډالر ترلاسه کوي.
نوموړی زیاته کړه داسې ویډیوګانې په لاس کې لري چې د امریکا بېپېلوټه الوتکې له کوم ځایه او له کومې لارې د افغانستان فضا ته ننوځي.
دا په داسې مهال ده چې له دې وړاندې د دفاع وزارت سرپرست محمدیعقوب مجاهد ادعا کړې وه چې د افغانستان پر فضا ګرځېدونکې بېپېلوټه امریکايي الوتکې له پاکستان څخه پورته کېږي.
مجاهد هغه مهال له پاکستان څخه غوښتنه کړې وه چې خپل هوايي حریم دې د افغانستان پر ضد د امریکا په واک کې نه ورکوي. خو د پاکستان د بهرنیو چارو وزارت بیا د نوموړې دغه څرکندونې بېبنسټه بللې وې او له اسلامي امارت یې غوښتنه کړې وه، که اسناد لري، وړاندې دې کړي.
عباس ستانکزي د پاکستان روان ناوړه اقتصادي وضعیت ته په کتو د دغه هېواد چارواکو ته په اشارې سره وویل چې د اقتصادي ناورین سره د مبارزې لپاره دې نورې لارې ولټوي او امریکا ته د خپل هوايي حریم د واک ورکولو له لارې دې پیسې نه پیدا کوي.
د اسلامي امارت په واکمنېدو سره د امریکا ولسمشر ویلي و چې له دې وروسته به له لرې لارې افغانستان کې له ترهګریزو ګواښونو سره مبارزه وکړي.
