د کړکېچ نړیوالې ډلې په یوه خپور کړي رپوټ کې ویلي چې پر افغانستان د لګېدلو بندیزونو دوام به په دغه هېواد کې یو میلیون کسان د لوږې او سختې سړې هوا له امله مړه کړي. دغې ډلې په افغانستان کې اقتصادي ستونزو ته په پام له نړیوالو غوښتنه کړې چې پر افغانستان لګېدلي بندیزونه دې لرې کړي.
د افغانستان لپاره د امریکا د بهرنیو چارو وزارت ځانګړي استازي ټوماس ویسټ ویلي، که څه هم په افغانستان کې د روان وضعیت په اړه پوهېږئ، خو تر هغه یې چې شرایط نه وي منل شوي، اسلامي امارت به په رسمیت ونه پېژني. ویسټ ټینګار کړی چې اسلامي امارت باید پر خپلو ژمنو عمل وکړي او امریکا هم باید په دې اړه ډاډ ترلاسه کړي.
له تېرو څو ورځو راهیسې په ټولنیزو شبکو کې داسې راپورونه لاس په لاس کېږي چې په هېواد کې د میوند خصوصي بانک سقوط کړی چې یادې چارې د ګڼشمېر هېوادوالو اندېښنې راپارولي دي. خو د اسلامي امارت او د افغانستان بانک چارواکي دا راپورونه ناسم بولي او وايي چې په هېواد ټول بانکونه فعال دي.
د کډوالو په چارو کې د ملګرو ملتونو عالي کمېشنري په افغانستان کې د وروستیو تحولاتو له امله د دغه هېواد د اقتصادي نظام له پاشلکېدو څخه خبرداری ورکړی. د دغه بنسټ غړي فلیپو ګرانډي د جېنوا په یوې انلاین غوڼده کې ویلي چې په افغانستان کې د اقتصادي بېثباتۍ له امله ګڼشمېر افغانان کډوالۍ ته اړ شوي دي.
د بريټانیې د بهرنیو چارو وزارت یوه پخواني کارکوونکي د دغه هېواد پارلمان ته ویلي چې لندن په کابل کې خپل افغان همکاران طالبانو ته پرېښودل، خو پیشوګانې او سپیان یې را واېستل. هغه په دغه بهیر کې د بريټانیې لومړی وزیر بورېس جانسن پر مستقیمې لاسوهنې تورن کړی دی.
د بحران نړیوالې ډلې مسوولان وایي، په افغانستان کې د اسلامي امارت په مشري پر حکومت اقتصادي فشارونو د دغه حکومت تګلاره نه شي، بدلولی او ښه به وي چې په ازمایښتي توګه د کنګل شویو پیسو یوه برخه ازاده کړل شي. دې ډلې وړاندیز کړی چې امریکا باید په تدرجي توګه د افغانستان کنګل شوې پیسې ازادې کړي.
د روسیې ولسمشر ویلاديمیر پوتین نوي ډيلي ته په خپل سفر کې د هند له لومړي وزیر نریندرا مودي او نورو هندي چارواکو سره کتلي دي.
د هند د بهرنیو چارو وزارت ویلي چې په دې کتنه کې د افغانستان د روان وضعیت په اړه خبرې شوي او دواړو هېوادونو یې په اړه ګډه اعلامیه هم خپره کړې ده. په اعلامیه کې د ویلاديمیر پوتین له قوله لیکل شوي چې روسیه په افغانستان کې د یوه ټولشموله حکومت ملاتړ کوي.
که څه هم د اسلامي امارت د خپلې واکمنۍ په لومړیو ورځو کې د یوه فرمان په ورکولو سره ویلي وو چې له هېواد بهر ته د زړو اوسپنو لېږد بندی شوی، خو د دې برخې کاروباریان او صنعتکاران لا هم پاکستان ته د اوسپنې د قاچاق په اړه اندېښنه څرګندوي. د اوسپنې یو کاروباري وايي، اوس هم د کندهار سپین بولدک له لارې زړې اوسپنې پاکستان ته قاچاقېږي.
د تخار لپاره د اسلامي امارت د اطلاعات او فرهنګ رییس انصارالله انصار ویلي چې د اسلامي امارت ځواکونو د دغه ولایت په رستاق ولسوالي کې د نوید په نوم د یوه کوچني ماشوم څخه د سر پرې کولو په تور یو کس نیولی دی.
په کابل کې د امریکا پخواني سفیر هوګو لاورنس ویلي چې امریکا له افغانستان سره پر خپلو کړیو ژمنو عمل نه دی کړی او له دغه هېواد او افغانانو سره یې خیانت کړی چې دا یو نه بښوونکی جنایت دی. دغه امریکايي ډيپلومات په افغانستان کې د تېرو دوو لسیزو د لاسته راوړنو له منځل تلل، د خواشینۍ وړ بللي او پړه یې د امریکا پر مشرانو وراچوي.
نن کابل کې د ودانیزو شرکتونو ټولنې د یوې اعتراضیه غونډې پرمهال وویل چې له نږدې درېوو میاشتو راهیسې د ودانیزو پروژو چارې په ټپه درېدلي او مسوولان یې یادې ستونزې ته پام نه کوي.
د پاکستان د بهرنیو چارو وزیر شاه محمود قریشي پرون وویل چې د افغانستان په اړه د اسلامي همکاریو سازمان غونډه د سعودي عربستان په بلنه د پاکستان په کوربهتوب جوړېږي. قریشی ویلي چې ټاکل شوې دغه غونډه په افغانستان کې د خراب بشري وضعیت او اقتصادي ناورین څخه د مخنیوي لپاره جوړه شي.
رویټرز خبري اژانس د نړیوال بانک له قوله رپوټ ورکړی چې د دغه بانک تمویلوونکي په پام کې لري چې د روانې ډسمبر میاشتې تر لسمې پورې د افغانستان د کنګل شویو پیسو او دغه هېواد ته یې د لېږد په اړه پرېکړه وکړي.
د ملګرو ملتونو د کډوالو عالي کمېشنرۍ د یوې خبرپاڼه په خپرولو سره خبرداری ورکړی چې په افغانستان کې بشري ناورین مخ په پراخېدو دی او لوږه په دغه هېواد کې خپلې کمسارې کچې ته رسېدلې. د دغه بنسټ ویاند بابر بلوچ ویلي چې نږدې ۲۳ میلیونه کسان په افغانستان کې له لوږې سره مخ دي چې له ډلې یې ۹ میلیونه وګړي د قحطۍ له جدي ګواښ سره دي.
پکتیا کې یوشمېر معلولین وايي، له تېرو څو میاشتو راهیسې یې معاش نه دی اخیستی او له ګڼو ستونزو سره مخ دي. دوی هغه غونډه کې چې افغان معلولینو ته د لاسرسي یا «AOAD» موسسې په همکارۍ جوړه شوې وه، له اسلامي امارت او نړیوالو بنسټونو او موسسو وغوښتل چې د اقتصادي ستونزو د حل لپاره یې معاشونه ورکړي.
محمد ناصر نوري د بادغیس مرکز قلعهنو ښار کې د یوه مېلمستون خاوند دی او وايي، میلیونونه افغانۍ یې لګولي، څو دغه مېلمستون جوړ کړي او له دې لارې ګټه ترلاسه کړي. خو په وینا یې، څه باندې ۳ میاشتې کیږي چې هېواد کې د وروستیو بدلونونو او د کورونا ویرووس خپرېدو په دلیل هېڅ عاید نهلري او ډېر زیامن شوي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
