طالبانو پرون ماښام خپله سرپرسته کابینه او ورسره یې په افغانستان کې خپل سرپرست حکومت اعلان کړ. د طالبانو د سرپرستې کابینې نوملړ چې ۳۳ کسان پکې شامل دي، پرون ماښام د طالبانو د ویاند له لوري په یوې خبري غونډه کې اعلان شوه. د طالبانو د ویاند د اعلان پربنسټ، ملا محمدحسن آخند له دوو مرستیالانو سره د نوي سرپرست حکومت د وزیرانو رییس ټاکل شوی دی.
وروسته له هغې چې پر پنجشېر ولایت د طالبانو په عملیاتو کې د پاکستان د پوځي بېپیلوټه الوتکې د بریدونو خبرونه خپاره شول، نن په کابل او د هېواد په یوشمېر نورو ولایتونو کې د پاکستان پر ضد په سلګونه کسانو پراخ لاریونونه وکړل.
د مخکیني حکومت د ملي روغې جوړې عالي شورا رییس عبدالله عبدالله وایي چې د زور له لارې پر نورو د خپلو غوښتنو منل، هېڅکله مطلوبې پایلې نه دي ورکړي او د خلکو د کړاو او درد لامل شوي دي.
د روسیې د بهرنیو چارو وزیر سرګي لاوروف وایي، د طالبانو له لوري د ټول ګډونه حکومت د جوړولو په صورت کې به د دغه هېواد استازي د لوړې په مراسمو کې ګډون وکړي. لاوروف پرون یوې خبري غونډې ته وویل چې روسیې د طالبانو د حکومت د لوړې مراسمو کې د ګډون بلنلیک ترلاسه کړی.
د طالبانو له لوري د کندوز له نیولو وړاندې په دغه ولایت کې نږدې ۱۵ تصویري، غږیزې او چاپي رسنیو فعالیت درلوده، خو اوس له دغو رسنیو څخه نیمايي تړل شوي او خبریالان یې په ځانګړې توګه ښځينه خبریالانې او کارکوونکې یې په کور ناستې دي. دوی وایي، که وضعیت همداسې دوام وکړي، اړ دي چې هېواد پرېږدي.
وروسته له هغې چې طالبانو د پنجشېر ولایت د نیولو ادعا وکړه، د ملي مقاومت جبهې قومندان احمد مسعود په یوه غږیز پیغام کې له خلکو غوښتنه کړې چې د طالبانو پر وړاندې دې «عمومي پاڅون» پیل کړي. وموړي همداراز په خپل ټویټرپاڼه کې لیکلي چې پنجشېر کې دی او مقاومت یې دوام لري.
کابل ته د پاکستان د استخباراتو یا ایاېسای د رییس فیض حمید راتګ پر ټولنیزو رسنیو د افغانان ګڼ غبرګونونه راوپارول. نن هم ځینو رسنیو داسې راپورونه خپاره کړي چې پر بنسټ یې، پاکستاني ځواکونو بېګاه د نوموړي له سفر وروسته پر پنجشېر د طالبانو په ملاتړ بریدونه کړي دي.
د مقاومت جبهې ویاند فهیم دشتي او د احمد مسعود سکرټر عبدالودود ذره بېګاه د طالبانو په برید کې ووژل شول. په همدې حال کې سرچینې پر پنجشېر د پاکستان د بېپیلوټه الوتکو د بمبار خبر ورکوي. شنونکي بیا باور لري چې د پاکستان د استخباراتو رییس د پنجشېر جګړې په مدیریت کې رول درلود او د پاکستاني ځواکونو موجودیت د جګړې لوری بدل کړ.
په پنجشېر کې د طالبانو ضد د مقاومت جبهې ویاند او د افغانستان د خبریالانو د ټولنې رییس فهیم دشتي بېګاه شپه پر پنجشېر د طالبانو په یوه برید کې وژل شوی دی.
بېګاه شاوخوا نهه بجې کابل او ځینې نور ولایتونه د طالبانو د سختو هوايي ډزو شاهدان وو.
د طالبانو د مسوولانو په وینا، په یادو هوايي ډزو کې ۱۷ کسانو ته مرګژوبله اوښتې ده. که څه هم طالبانو نه ده روښانه چې په دغو کسانو کې څو کسان وژل شوي او څو یې ټپیان دي، خو د راپورونو له مخې، یوازې په کابل کې دوه کسان وژل شوي او درې نور ټپیان دي.
غور کې ځينې هغه خبریالان چې پر افغانستان د طالبانو له کنټرول وروسته د قاچاق له لارې نورو هېوادونو ته تللي وايي، د یوشمېر هممسلکانو د برخلیک په اړه هېڅ ډول معلومات نه لري. دوی سلاموطندار ته ویلي چې خبریالان له طالبانو څخه د وېرې، بېوزلۍ، وزګارتیا او د رسنیو د ملاتړو بنسټونو نه پام له کبله اړ شوي چې په قاچاقي توګه بهر ته ولاړ شي.
یوشمېر خبریالان په هېواد کې اطلاعاتو ته د لاسرسي قانون له نقض څخه اندېښنه لري او وایي، د حکومت په بدلېدو سره رسنۍ هم تر نظر او څار لاندې نیول شوي دي. دوی وایي، طالبانو د رسنیو له مسوولانو سره په خپله لومړۍ ناسته کې دا پرېکړه وکړه چې د رسنیو نشرات باید د اسلامي امارت په چوکاټ کې وي.
د پنجشېر د مقاومت جبهې ویاند فهیم دشتي وايي، له څلورو ورځو راهیسې د دغه ولایت په دوو جبهو کې جګړه پیل شوې چې له کبله یې له ۳۵۰ ډېر طالبان وژل شوي دي.
د نوموړي په وینا، په یادو نښتو کې ۲۸۷ طالبان ټپیان شوي او ۳۵ نور یې د دوی لاس ته ورغلي دي.
د امریکا د پوځ لوی درستیز جنرال مارک میلي له افغانستانه د دغه هېواد د ځواکونو له وتلو وروسته د لومړنۍ خبري ناستې پر مهال په افغانستان کې د داعش ډلې حضور د هېواد لپاره ستر ګواښ بللی دی.
میلي ویلي، که څه هم تر اوسه روښانه نه ده چې ایا طالبان بدل شوي، که نه، خو امریکا ښايي د ترهګرۍ، په تېره د داعش ډلې پر وړاندې مبارزه کې له طالبانو سره همکاري وکړي.
له هغه وروسته چې طالبانو کابل ونیوه، د ګڼشمېر هېوادونو سفارتونو خپلې چارې درولي او د امریکا او بریټانیا په ګډون ځینو هېوادونو بیا خپل کارکوونکي او سفارتونه له هېواده اېستلي دي.
خو روسیه، چین، ایران او پاکستان هغه هېوادونه دي چې خپلو کارونو ته يې دوام ورکړی او ویلي يې دي چې د خپلو سفارتونو د تړلو پلان نه لري.
د طالبانو د رهبرۍ غړی امیرخان متقي نن په یوه خپور کړي غږیز پیغام کې ویلي چې پنجشېر کې د مقاومت جبهې مشرانو سره خبرې بېپایلې پای ته رسېدلي دي.
