د روسیې د بهرنیو چارو وزیر سرګي لاوروف وایي، د طالبانو له لوري د ټول ګډونه حکومت د جوړولو په صورت کې به د دغه هېواد استازي د لوړې په مراسمو کې ګډون وکړي. لاوروف پرون وویل چې روسیې د طالبانو د حکومت د لوړې مراسمو کې د ګډون بلنلیک ترلاسه کړی.
د سلاموطندار پښتو فېسبوکپاڼه وڅارئ
د روسیې د بهرنیو چارو وزیر زیاته کړې: «مونږ غواړو د یوه داسې حکومت له جوړېدو څخه ملاتړ وکړو چې د افغانستان د ټولنې له هغې ډلې طالبان او له پښتنو پرته، هزاره، اوزبیک او تاجک پکې شامل وي. یوازې یو ټول ګډونه حکومت کولای شي چې د نوي ژوند ډاډ در کړي.»
د سرګي لاوروف په وینا، روسیه د یو ټول ګډونه حکومت د تشکیل او تضمین څخه خوښي څرګندوي او په داسې حال کې به د افغانستان پر وضعیت له اغېزمنو هېوادونو سره به په دغو مراسمو کې یوځای ګډون کوي.
د یو لړ راپورونو پر بنسټ، طالبانو له روسیې، چین، ایران، پاکستان، ترکیې او قطر ته بلنه ورکړې چې د دوی د نوي اعلانېدونکي حکومت په مراسمو کې ګډون وکړي.
- شنونکي: روسیه په سیمهييزه کچه د نفوذ ساتلو په لټه کې ده
- روسیه نږدې راتلونکي کې د افغان سولې په تړاو د یوې غونډې کوربهتوب کوي
- د افغانستان قضیې په اړه د امریکا او نورو هېوادونو په همکاري د روسیې هڅې
طالب مشرانو له دې وړاندې ویلي چې د یوه ټول ګډونه حکومت پر جوړېدو لګیا دي او د هېواد ټول ملیتونه به پکې ونډه ولري.
له دې سره هممهاله، چین ویلي چې د یوه ټول ګډونه، پراخ، او د یوه انډولیز لرونکي کورني او بهرني سیاست چې له خپلو ګاونډیانو سره په ښو شرایطو کې ژوند وکړي، ملاتړ کوي.
خو دغه هېواد تراوسه د طالبانو د نوي حکومت د لوړې په مراسمو کې د بلنلیک په اړه څه نه دي ویلي.
د طالب چارواکو د معلوماتو پراساس، تمه ده نوی حکومت په راتلونکو څو ورځو کې اعلان شي. له دې وړاندې ګڼو هېوادونو ویلي وو، د طالبانو حکومت جوړېدو او کړنو ته په کتو به د دوی د رسمیت پېژندلو په اړه پرېکړه کوي.
