په پنجشېر کې د طالبانو ضد د مقاومت جبهې ویاند او د افغانستان د خبریالانو د ټولنې رییس فهیم دشتي بېګاه شپه پر پنجشېر د طالبانو په یوه برید کې وژل شوی دی.
د فهیم دشتي وژنې د ګڼشمېر خبریالانو، د رسنیو فعالانو او سیاستوالو غبرګونونه له ځان سره درلودلي دي او هغه یې د ازادۍ اتل بللی دی.
د سلاموطندار پښتو فېسبوکپاڼه وڅارئ
د مقاومت جبهې مشر احمد مسعود د نوموړي وژنې ته غبرګون ښودلی او ویلي یې دي چې نوموړی، د ازادۍ ترلاسه کولو او له جګړې سره پر مبارزه وژل شوی دی.
د خبریالانو د خوندیتوب کمېټې د عدالت غوښتنې مسوول صدیقالله توحیدي لیکلي: «ملګریه، له څو اوښکو پرته نور څه نه لرو چې لاره کې یې درته بدرګه کړم. افسوس چې په دغه سفر یوازې لاړې او زمونږ زړه مو زخمي کړ.»
د مقاومت جبهې له ویاندویانو څخه میثم نظري پر خپله فېسبوکپاڼه لیکلي چې فهیم دشتي او عبدالودود ذره له طالبانو سره په جګړه کې وژل شوي دي.
- یوشمېر خبریالان اطلاعاتو ته د لاسرسي قانون له نقض څخه اندېښنه لري
- د بېپولې خبریالانو ټولنه: له افغانستانه مو د زیانمنو خبریالانو د اېستلو لسګونه غوښتنلیکونه ترلاسه کړي
- متقي: د پنجشېر مسلې د هواري لپاره هڅې بې پایلې وې
هغه لیکلي: «په ډېرې خواشینۍ سره چې دوه وروڼه او ګران او مبارز همکاران مو له لاسه ورکړل. د احمد مسعود د دفتر مشر فهیم دشتي او د افغانستان د ملي اتل خوریی جنرال عبدالودود ذره نښتو کې وژل شوي دي.»
سره له دې چې د احمد مسعود په مشري د مقاومت جبهه د فهیم دشتي د وژل کېدو څرنګوالي په اړه څه نه وايي، خو د طالبانو ویاند ذبیحالله مجاهد نن کابل کې یوې خبري غونډې ته وویل چې دشتي له طالبانو سره په جګړه کې نه دی وژل شوی.
نوموړي وویل چې د مقاومت جبهې ویاند فهیم دشتي د دغې جبهې د اړوندو کسانو ترمنځ د شخړې له امله وژل شوی دی.
د مقاومت جبهې د ویاند فهیم دشتي وژل کېدو د ټولنیزو شبکو د کارونکو غبرګونونه هم را پورته کړي. دوی نوموړی ازاد مقاومت کونکی او وطنپاله کس بللی دی.
