د مقاومت جبهې ویاند فهیم دشتي او د احمد مسعود سکرټر عبدالودود ذره بېګاه د طالبانو په برید کې ووژل شول. په همدې حال کې سرچینې پر پنجشېر د پاکستان د بېپیلوټه الوتکو د بمبار خبر ورکوي.
د سیاسي چارو شنونکي بیا باور لري چې د پاکستان د استخباراتو رییس د مقاومت جبهې او طالبانو ترمنځ د جګړې په مدیریت کې رول درلود او د پاکستاني ځواکونو موجودیت وضعیت بدل کړ.
د سلاموطندار پښتو ټویټرپاڼه وڅارئ
د دوی په وینا، طالبان پرمختللې نظامي الوتکې نه لري او په یوه اوونۍ جګړه کې یې د پام وړ لاستهراوړنې نه لرلې.
د سیاسي چارو شنونکی سیدباقر محسني وايي چې طالبانو په یوه اوونۍ کې د پنجشېر جګړه کې د پام وړ پرمختګ ونه کړ، خو د پاکستاني ځواکونو په تجاوز سره جګړه د طالبانو په ګټه تمامه شوه.
- پر پنجشېر د طالبانو برید؛ د دغې ډلې ۸ کسان وژل شوي
- د ملګرو ملتونو د بشري حقونو د شورا ناسته؛ نړۍ طالبان څاري
- پنجشېرکې د طالبانو او مقاومت جبهې پلاویو ترمنځ خبرې روانې دي
یو بل سیاسي شنونکی اکرم عارفي هم وايي چې د طالبانو په لیکو کې د پاکستاني استخباراتو پراخ حضور د پټېدو نه دی او په دې برخه کې ډېر شواهد شته چې په وینا یې، د پنجشېر په جګړه کې یوشمېر طالبان په بېلابېلو ژبو خبرې کوي.
خو طالبان پر پنجشېر د پاکستاني بېپیلوټه الوتکو برید نه مني او وايي، کابل ته د ایاېسای د رییس د راتګ موخه د دواړو لوریو ترمنځ د همکاریو دوام دی.
له هغه وروسته چې طالبانو د پلازمېنې کابل په ګډون، ۳۳ ولایتونه ونیول، پنجشېر کې یې پر وړاندې مقاومت پیل شو او تراوسه روان دی.
سره له دې چې د طالبانو ویاند ذبېحالله مجاهد په بشپړ ډول د پنجشېر د نیولو خبر ورکوي، خو د مقاومت جبهه دا موضوع نه مني او وايي چې ځواکونه یې په ټولو سټراټېژیکو سیمو کې ځای پرځای شوي دي.
