د کاپیسا امنیتي مسوولان وايي چې دغه ولایت کې د «قران ختم» ترسره کېدو پر سر د لفظي شخړې له امله نښته رامنځته شوې چې په پایله کې یې دوه کسان مړه او څلور نور ټپیان شوي دي. نوموړی ټینګار کوي چې د پېښې په تړاو درې تورن کسان نیول شوي او دا مهال ترې پوښتنې ګروېګنې روانې دي.
د ننګرهار سپین غر ولسوالي کې محلي سرچينې سلاموطندار ته وايي چې د دې ولسوالي په شډل سیمه کې د امنیتي ځواکونو او عامو خلکو ترمنځ نښته رامنځته شوې ده.
د سرچینې په وینا، دغه نښته نن له غرمې مخکې هغه مهال رامنځته شوه چې امنیتي ځواکونو په شډل سیمه کې د خلکو کرل شوي کوکنار لهمنځه وړل.
د نیمروز محلي مسوولان وايي چې د ا.ا ځواکونو نن د دغه ولایت د مرکز زرنج ښار په سیداباد سیمه کې د داعشیانو پر یوه پټنځای عملیات کړي دي.
د افغانستان د روان سیاسي کړکېچ په اړه د سیمهییزو او نړیوالو غونډو په دوام، ټاکل شوې د افغانستان د ګاونډیو هېوادونو د بهرنیو چارو وزیرانو څلورمه غونډه د روانې اوونۍ د پنجشنبې په ورځ د ازبکستان په سمرقند ښار کې جوړه شي. په دې غونډه کې د روسیې، چین، ایران، پاکستان، تاجکستان، ترکمنستان او ازبکستان استازي ګډون کوي.
اسلامي امارت په تېر شاوخوا یونیم کال کې په ځلونو له نړیوالې ټولنې غوښتي چې رسمي تعامل ورسره وکړي او حکومت یې په رسمیت وپېژني، خو نړیوالې ټولنې په کور دننه د ا.ا د سیاستونو او پر خلکو، په تېره ښځینهوو د محدودیتونو لګولو له کبله دا غوښتنه منلې نهده.
کابل ښار کې د ګلانو او نیالګیو یوشمېر پلورونکي وايي چې د تېرو کلونو په پرتله یې سږکال د پېر کچه لوړه شوې ده.
ولي محمد چې له تېرو ۱۸ کلونو راهیسې د کابل ښار په یوه څنډه کې ګلان پلوري، وايي چې روان کال یې د ګلانو او نیالګیو برخه کې ۳۰۰زره افغانۍ پانګونه کړې ده.
د دایکندي امنیتي مسوولان وايي چې د دغه ولایت په مرکز نیلي ښار کې د ټرافیکي پېښې له امله دوه کسان مړه او یو بل ټپي شوی دی.
د دایکندي د امنیې قومنداني د رسنیو دفتر په یوې خبرپاڼه کې ویلي چې پېښه پنجشنبه ماښام د وري ۱۷مه د دوو موټرسایکلو د ټکر له امله رامنځته شوې ده.
د کندهار امنیتي مسوولان وايي چې بېګاه شپه دغه ولایت کې یوه روږدي کس خپله مېرمن په مرموز ډول وژلې او له سیمې تښتېدلی دی.
پېښه بېګاه شپه د کندهار ښار د لومړۍ حوزې اړوند سیمه کې رامنځته شوې ده.
افغانستان کې د ملګروملتونو سازمان اړوند دفترونو کې له کار د ښځو ګرځولو ته د غبرګونونو پر دوام، د افغانستان لپاره د یاد سازمان د سرمنشي ځانګړې استازې روزا اوتونبایوا، د یاد سازمان د سرمنشي مرستیاله امنه محمد او د امریکا د بهرنیو چارو وزیر انټوني بلنکېن د اسلامي امارت دغه پرېکړه غندلې او هغه یې د افغانانو لپاره اندېښمنونکې بللې ده.
د افغانستان بانک وايي چې راتلونکې شنبه د وري ۱۹مه نېټه به «۱۵» میلیونه امریکايي ډالر د لیلام په توګه بازار ته وړاندې کوي.
د افغانستان بانک نن (پنجشنبه د ۱۴۰۲ د وري اوولسمه) پر خپله ټوېټرپاڼه لیکلي چې د «افغانۍ» ارزښت ساتنې او ثبات لپاره به راتلونکې شنبه «۱۵» میلیونه امریکايي ډالر لیلام کړي.
له هغه وروسته چې اسلامي امارت په ننګرهار کې د ملګرو ملتونو د ښځینه کارکوونکو د کار مخه ونیوله، دغه سازمان یې په غبرګون کې په افغانستان کې خپلو ټولو ښځینه کارکوونکو ته چې شمېر درېنیم زرو ته رسېږي، خبر ورکړی چې تر راتلونکو ۴۸ ساعتونو پورې دندو ته ور نهشي.
د افغانستان بانک مسوولانو نن کابل کې یوې خبري ناستې ته د یاد بانک د کلني راپور د وړاندې کولو پرمهال وویل چې د هېواد د تورم نرخ ۳.۵سلنې ته ټیټ شوی دی.
پر ټولنیزو رسنیو د ا.ا اړوند ځواکونو له لوري د یوه ځوان د وهلو ویډیو له خپرېدو وروسته، د پلازمېنې یوشمېر اوسېدونکي له خلکو سره د ا.ا د ځواکونو له ناسم چلن څخه شکایت کوي. د امربالمعروف و نهېعن المنکر وزارت ویاند عاکف مهاجر سلام وطندار ته وویل، دغه محتسب ټکسي چلوونکي ته د سپکاوي په تور د اسلامي امارت لهخوا نیول شوی دی.
د ا.ا ځواکونو بېګاه د نیمروز په مرکز زرنج ښار کې د داعش ډلې پر یوه پټنځای عملیات کړي، خو لا یې د عملیاتو څرنګوالي او له کبله یې د اوښتې مرګژوبلې په اړه څه نهدي ویلي.
په زرنج ښار کې ځینو سرچینو بېګاه سلاموطندار ته وویل چې د شپې شاوخوا یوولس بجې په ښار کې د سپکو او درنو وسلو ډزې پیل شوي او د ا.ا ځواکونو د سیمې یوشمېر اوسېدونکي هم له کورونو را اېستلي دي.
په افغانستان کې د ملګرو ملتونو ځانګړې استازولۍ یا یوناما پر ټویټر لیکلي چې په ننګرهار کې د ملګرو ملتونو د ښځینه کارکوونکو د کار مخه نیول شوې ده.
یوناما د دې پېښې په اړه د اندېښنې ښودلو تر څنګ، ټینګار کړی چې باید ښځینه کارکوونکو ته یې د کار اجازه ورکړل شي.
د ملګروملتونو د بشري مرستو د همغږي ادارې اوچا څه موده وړاندې ویلي و چې روان میلادي کال افغانستان کې اړمنو سره د مرستو لپاره ۴ میلیارډ او ۶۰۰ میلیونه ډالرو ته اړتیا لري.
یاد سازمان تازه د اندېښنې په څرګندولو سره ویلي، افغانستان کې بېوزلو کورنیو سره د مرستې لپاره یې د غوښتل شویو مرستو له ډلې یوازې ۵سلنه ترلاسه کړي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
