د ژغورنې نړیوالې کمېټې ویلي چې د اوکراین ناورین ته د نړۍ د پام وګرځېدو ته په کتو باید د افغانستان وضعیت هم له پام څخه ونه غورځول شي. د ژغورنې نړیوالې کمېټې افغانستان کې اقتصادي ناورین ته د رسېدو او افغانانو څخه د ملاتړ په موخه د مرستو د ډېروالي په برخه کې د امریکا او نورو هېوادونو وروستي ګامونه ستایلي دي.
د خبریالان د خوندیتوب نړیوالې کمېټه وايي چې افغانستان کې رسنۍ په خورا بد وضعیت کې دي. د دې کمېټې د موندنو له مخې، په داسې حال کې چې افغان رسنیو په تېرو دوو لسیزو کې ښې لاستهراوړنې درلودې او د پرمختګ پر لور روانې وې، خو اوس د بندیزونو له یوه نوي پړاو سره مخ شوي دي.
په پولنډ کې د افغانستان سفارت ویلي چې پر اوکرایین د روسیې د برید راهیسې تراوسه ۲۰۰۰ افغانانو له اوکرایین څخه پولنډ ته پناه وړې ده.
د ملګرو ملتونو امنیت شورا د پنجشنبې په شپه د افغانستان پر وضعیت غونډه وکړه. په دې غونډه کې د افغانستان لپاره د ملګرو ملتونو د سرمنشي ځانګړې استازې ديبورا لاينز امنیت شورا ته د افغانستان وضعیت په اړه راپور وړاندې کړ. هغې وویل، ملګري ملتونه او همکاران یې ژمي کې افغانستان کې د بشري اړتیاوو د پوره کېدو لپاره خپله ټوله هڅه کوي.
د افغان ښځو او بشري حقونو لپاره د امریکا ځانګړې استازې رینا امیري وویل، افغانستان باید د ثبات خوا ته د تلو لپاره د ښځو او نجونو له استعداد څخه ګټه پورته کړي.
هغې پر خپله ټویټرپاڼه لیکلي چې د افغان ښځو او بشري حقونو او اسلامي نړۍ کې یې د رول ارزښت په اړه د قطر چارواکیو سره څو ورځې د دغه هېواد پلازمینه دوحه کې بحث او خبرې کړي دي.
نړیوال بانک ویلي، د افغانستان د بیارغونې صندوق او د نړیوالې ټولنې د تمویلوونکو په غوښتنه، د دغه بانک مشرتابه پلاوي د افغانانو د ملاتړ لپاره پرمختیايي کړنلاره تصویب کړې .
د نړیوال بانک اعلامیه کې راغلي چې د دغې کړنلارې پربنسټ د افغانستان د بیارغونې صندوق یو میلیارد ډالر ملګروملتونو او غیردولتي نړیوالو سازمانونو ته ځانګړي کیږي.
دوه ورځې مخکې ( یکشنبې په ورځ د کب په ۸ نېټه) د اسلامي امارت ویاند او د اطلاعاتو او فرهنګ وزارت معین په یوه خبري غونډه کې وویل، هغه کسان چې مشکل نه لري بهرنیو هېوادونو ته د تګ اجازه نه لري. هغه ویلي په بهرنیو هېوادونو کې مېشت افغانان په ډېر بد وضعیت سره ژوند کوي.
د کډوالو او بېرته راستنېدونکو چارو وزارت له افغانستان څخه نورو هېوادونو ته د افغانانو د هڅولو پر تګلارې نیوکه کوي او وايي چې دا تګلاره د نړیوالو قوانین خلاف عمل دی.
ټاکل شوې د ملګروملتونو امنیت شورا سبا د افغانستان د وضعیت په اړه ناسته وکړي. افغانستان کې د ملګرو ملتونو د استازولۍ یا یوناما ویلي چې سبا به د ملګروملتونو امنیت شورا کې د افغانستان وضعیت وڅېړل شي. د افغانستان لپاره د ملګروملتونو ځانګړې استازې ډیبورا لاینز به په دې ناسته کې د افغانستان د وضعیت په اړه رپوټ هم وړاندې کړي.
د ۲۰۲۰ میلادي کال د فبرورۍ په ۲۹ نېټه د امریکا او د اسلامي امارت ترمنځ د دوحې هوکړه لاسلیک شوه چې سبا یې دوه کاله پوره کېږي.
دغه هوکړه چې د دوحې هوکړې په نوم نومول شوې په قطر کې د اسلامي امارت د هغه وخت سیاسي مرستیال عبدالغني برادر او د افغان سولې لپاره د امریکا د ځانګړي استازي زلمي خلیلزاد ترمنځ لاسلیک شوه.
ټاکل شوې چې د ملګروملتونو امنیت شورا نن په دې سازمان کې پر اوکرایین د روسیې د یرغل په اړه بېړنۍ غونډه جوړه کړي.
ننګرهار کې یوشمېر قومي مشرانو او سوداګرو افغانستان کې د پاکستان له سفیر منصوراحمد خان سره په لیدنه کې له دغه هېواد غوښتنه کړې چې تورخم کې دې افغانانو ته پر پېژندپاڼو د تګ راتګ اجازه ورکړي.
د افغانستان لپاره د اروپايي ټولنې سفیر وان برانټ د اسلامي امارت د ځواکونو له لوري کور په کور د پلټنې عملیاتو په غبرګون کې ویلي چې دغه بهیر دې ژر تر ژره ودرول شي. برانټ پر خپل ټویټرپاڼه لیکلي: «وېره، د کور پلټنه او د نورو قومونو او ښځو پر وړاندې تاوتریخوالی جنایت دی او باید ژر تر ژره ودرول شي.»
د جوزجان د امربالمعروف او نهی عنالمنکر رییس محمد یاسین وقاص او د دغه ولایت د اطلاعاتو او فرهنګ امر بسمالله نصرت نن د جوزجان له سیمهییزو راډیوګانو څخه لېدنه وکړه او د دغو رسنیو له مسوولانو څخه یې وغوښتل چې خپلې خپرونې دې د اسلام د سپېڅلي دین له لارښوونو سره سم چمتو او خپرې کړي.
د اسلامي امارت ویاند ذبیحالله مجاهد نن کابل کې د یوې خبري غونډې پرمهال وویل چې کابل کې د روانو چاڼیزو عملیاتو پرمهال یې ۶ داعشیان او د ۹ انسان تښتونکو سربېره یوشمېر وسلې او نور مهمات هم نیولي دي.
د پوهنې وزارت چارواکي وایي، د دې وزارت له لوري د نجونو ښوونځیو د بېرته پرانستل کېدو طرحه بشپړه شوې او سبا دوشنبه به د تصویب په موخه د اسلامي امارت کابینې ته واستول شي.
