د افغانستان د اسلامي امارت د اطلاعاتو او فرهنګ وزارت معین او ویاند ذبیحالله مجاهد نن کابل کې د یوې خبري غونډې پر مهال د سرپرستې کابینې د پاتې غړيو نوملړ اعلان کړ. اسلامي امارت قلندر عباد د روغتیا وزارت د سرپرست په توګه او عبدالباري عمر او محمدحسن غیاثي یې د معینانو په توګه ټاکلي دي.
د سلاموطندار راډیو خبریال او د متن اډېټور محمدعلي احمدي د روانې اوونۍ د شنبې په ورځ له دفتر څخه کور ته پر لار و چې د یوه وسلهوال برید لاندې راغی او په دې برید کې یې یوه پښه ژوره تپي شوې ده. تراوسه روښانه نه ده چې دغه برید د کومې ډلې له لوري شوی دی.
یوشمېر افغانان چې کلونه یې له بهرنیو ځواکونو سره په افغانستان کې دنده ترسره کړې، وايي چې له هېواده د دوی د وتلو لپاره هېڅ هڅه نه ده شوې او د وتلو له بهیر څخه پاتې دي. دوی وايي، سره له دې چې په وار وار یې له اړونده چارواکو او بنسټونو سره اړیکه نیولې او د مرستې غوښتنه یې کړې ده، خو ځواب یې نه دی تر لاسه کړی.
د روغتیا نړیوال سازمان رییس تدروس آدهانوم د دغه سازمان د یوه پلاوي په مشري، نن کابل ته راغلی دی. د روغتیا وزارت چارسمبالي وحید مجروح رسنیو ته ویلي چې د روغتیا نړیوال سازمان رییس او ورسره مل پلاوی یې نن کابل ته راغلي دي. دغه سفر وروسته له هغې کېږي چې نړیوال بانک په افغانستان کې د روغتیا برخې سره خپلې مرستې ودرولې.
د اسلامي دولت نومي ډلې یا داعش دوه ورځې وړاندې د ننګرهار په مرکز جلال اباد کې د طالبانو پر وړاندې د شویو چاودنو مسوولیت پر غاړه اخیستی دی. طالبانو تراوسه په رسمي توګه په دې اړه څه نه دي ویلي. د راپورونو له مخې، جلال اباد ښار کې په تېرو دوو ورځو کې پنځه چاودنې شوې دي.
د پاکستان حکومت او خلکو له افغانستان سره د ۳۰۰ ټنه خوراکي او طبي توکو مرسته وکړه چې نن د تورخم له لارې په ۱۷ موټرو کې افغانستان ته رالېږدول شوې ده.
پکتيا کې د رسنيو مسوولان وايي، د نظام په بدلېدو سره ډېری چاپي رسنيو د اقتصادي ستونزو له امله خپل فعاليتونه درولي دي. د پکتيا پريس کلب مشر فريدالله احمدزي سلاموطندار ته وويل په دې ولايت کې د مالي ستونزو او د کاري چاپيريال د نشتوالي له امله شپږ چاپي رسنۍ، مدار، افغان ننګ، سبا، تحليل، څراغ او پکتيا غږ مهالنۍ نشرات په ټپه ولاړ دي.
وروسته له هغې چې د طالبانو د پوهنې وزارت له نجونو پرته ښوونځیو ته د هلکانو د ورتګ پرېکړه وکړه، لا یې هم په اړه غبرګونونه روان دي.
سره له دې چې انګور په هېواد کې د باغلرونکو یوه عایداتي سرچینه ګڼل کېږي، خو د انګورو یوشمېر سوداګر او پلورونکي وايي چې سږ کال یې حاصلات کم شوي دي.
د کندهار د سوداګرۍ خونې مرستیال عبدالباقي بینا وايي، د تېر کال په پرتله سږ کال د انګورو حاصلاتو کی شاوخوا ۷۰ سلنه کموالی راغلی او لامل یې هم د انګورو د حاصلاتو ټولولو موسم کې سخته جګړه او وچکالي وه.
د بشري حقونو خپلواک کمېسیون نن په یوه خبرپاڼه کې له طالبانو غوښتي چې په ټول هېواد کې باید د بشري حقونو، په تېره د ښځو او ماشومانو د وضعیت په اړه خپلواکې او بېپرې څارنې ته اسانتیاوې برابرې کړي. خبرپاڼې لیکلي چې د ملګرو ملتونو د بشري حقونو د سازمان شورا دې په افغانستان کې د بشري حقونو د نقض د څارنې لپاره ځانګړې تګلاره جوړه کړي.
د طالبانو د پوهنې وزارت د یوې خبرپاڼې په خپرولو سره له شپږمه د لوړو ټولګیو له نارینه زدهکوونکو غوښتي چې سر له نن «شنبې» څخه دې خپلو ښوونځیو ته حاضر شي، خو په دې خبرپاڼه کې د ښځینه زدهکوونکو د برخلیک په اړه څه نه دي ویل شوي. د پوهنې وزارت دغې خبرپاڼې د ښځینه زدهکوونکو غبرګونه راپارولي دي.
کندوز ولایت کې د پنبې د پروسس یوه شرکت فعالیتونه چې د جګړو او نښتو له امله په ټپه درېدلي وو، اوس یې یو ځل خپل فعالیتونه پیل شوي دي.
د خبریالانو نړیوال فدراسیون د یوه راپور په خپرولو سره ویلي چې افغانستان کې د طالبانو د واکمنېدو راهیسې، نږدې ۱۵۳ رسنۍ اړ شوي چې خپل فعالیتونه ودروي او ښځينه خبریالانې هم په رسنیو کې له کار کولو محرومې شي. دغه فدراسیون د خبریالانو او د رسنیو کارکوونکو پر وړاندې د تاوتریخوالي زیاتېدو په اړه خپله اندېښنه څرګنده کړې ده.
د امریکا پوځ د مرکزي قومندانۍ یا سنتکام قومندان جنرال فرانک کنټ مککنزي تایید کړې چې د اګسټ په ۲۹مه کابل کې د دغه هېواد په هوايي برید کې په تېروتنه د یوې کورنۍ ۱۰غړي یې وژلي دي. د جنرال مککنزي دغو څرګندونو د امریکا د کانګرس د یوشمېر غړو تند غبرګونونه راپارولي دي.
د تاجکستان ولسمشر امامعلي رحمان د شانګهای د غړو هېوادونو سازمان په غونډه کې ویلي چې هېواد یې په افغانستان کې د ټولشموله حکومت جوړېدل غواړي او که د خلکو له عمومي افکارو پرته حکومت جوړ شي، بدې پایلې به ولري. رحمان له نړیوالې ټولنې، په ځانګړې توګه ملګرو ملتونو څخه غوښتي چې افغانانو ته بیړنۍ مرستې ورسوي.
په جوزجان کې د طالبانو امنیتي مسوولان وايي چې د دغه ولایت د مرکز شبرغان ښار په بېلابېلو برخو کې یې د غلا او نشهيي توکو د کارونې په تور اته کسان نیولي او د نورو مجرمانو د نیولو لړۍ روانه ده.
