د مالیې وزارت سرپرست محمد خالد پاینده نن کابل کې یوه خبري غونډه کې د ۱۴۰۰مالي کال د بودیجې سند تصویب کې د ځنډ له کبله د ناوړه پایلو په اړه خبرداری ورکړ او ويې ويل، که ولسي جرګه بودیجه تصویب نه کړي، هېواد کې به د بېوزلۍ کچه لوړه شي او اقتصادي وده به زیان وویني.
نن پلازمېنه کابل په یوه ساعت کې د درېيو چاودنو شاهده وه. د کابل د امنیې قومندانۍ ویاند فردوس فرامرز وایي، لومړۍ چاودنه د پغمان ولسوالۍ اړوند «عبدالعلي کلا » کې وشوه چې زیان یې نه درلود.
په دغه چاودنه کې یو رنجر موټر د ماین ښکار ګرځېدلی.
د فرامرز په وینا، دویمه بمي چاودنه چې د سهار ۸:۳۸ دقیقې د دویمې امنیتي ناحیې اړوند قوای مرکز سیمه کې په یوه فرونر ډوله موټر وشوه، په ترس کې یې څلور کسان ټپیان شول.
د فراه او نیمروز د ولایتي شورا په دغو ولایتونو کې د ۱۸ دفاعي ځواکونو د وژل کېدو خبر ورکوي.
د فراه د ولایتي شورا غړي خیرمحمد نورزي سلاموطندار ته ویلي، طالبانو بېګاه د یوه نفوذي کس په وسیله د ملي اردو ۹ سرتېري وژلي دي. د نوموړي په وینا، یاد نفوذي کس په فراهرود کې د ملي اردو په یوه مرکز کې له دې ډلې سره همکاري کړې ده. د ولایتي شورا دغه غړی وايي، په پېښه کې د ملي اردو ۵ نور سرتېري ټپیان شوي هم دي. طالبانو د یاد مرکز ځینې نظامي تجهیزات هم له ځانه سره وړي دي.
د بامیان د امنیې قومانداني مسوولان په دغه ولایت کې د بډو اخیستو په تور د یوه څارنوال د نیولو خبر ورکوي.
د بامیان امنیه قوماندان زبردست ساپي سلاموطندار ته ویلي چې پرون یې د دغه ولایت د یکاولنګ۱ ولسوالي یو څارنوال د ۳۰ افغانیو بډو اخیستو پر مهال نیولی دی. ساپی د نیول شوي کس په اړه نور جزیات نه ورکوي.
د کونړ ولایت په سرکاڼو، مرورې او نرنګ ولسوالیو کې د لمریزې برښنا پر مټ د اوبو څلور شبکې جوړې او نن ترې ګټه اخيستل پیل شول چې څلور زره جریبه للمي ځمکه به پرې خړوبه شي.
دغه شبکې د کونړ پر سیند جوړې شوي دي.
د اوبو لګولو پر دغو شبکو کرنې او مالدارۍ وزارت ۹۱،۲ میلیونه افغانۍ لګولي چې نن د کونړ والي او یاد وزارت چارواکیو پرانيستلې.
د کابل په سوېل ۴۰ کیلومټرۍ لوګر کې د یوه لوی نړیوال هوايي ډګر سروې چارې پیل شوې چې ۸۰۰میلیونه ډالره لګښت به پرې راشي. دغه نړیوال هوايي ډګر د محمد اغې ولسوالۍ د دولت کلا په دښته کې د ولسمشر محمد اشرف غني د پلرني کلي په شمال لوېدیځه څنډه کې جوړېږي.
د لوګر والي عبدالقیوم رحیمي نن د یوې خبري غونډې په ترڅ کې وویل، د لوګر محمداغې ولسوالۍ کې نړیوال…
د کابل امنیه قومانداني وايي چې په کابل ښار کې د کلیو بیارغونې او پراختیا وزارت څلور کارکوونکي ترور شوي دي.
د کابل د امنیې قومانداني ویاند فردوس فرامرز وايي، نن سهار شاوخوا ۹:۲۰ دقیقې د کابل ښار پنځمې امنیتي حوزې اړوند د باغ داوود پر سړک د کلیو بیارغونې او پراختیا وزارت څلور کارکوونکي د وسلهوالو له لوري ترور شوي دي.
د عامې روغتیا وزارت ۳ کارکوونکي د ۸۰ زره ډالرو بډو اخیستو په تور په بند محکوم شول. لويې څارنوالۍ د يوې خبرپاڼې په خپرولو سره ويلي، په یاو ۳ کسانو کې د مرکزي سټاک امریت سرپرست غلام سخي نظر او د مرکزي سټاک د راپورونو د رسید مدیر غلام مصطفی پر پنځو پنځو کلونو او د فني امریت معتمد احمد فواد پر ۳ کالو تنفیذي بند محکوم شوي دي.
امريکايي جمهوري غوښتونکي سناتور لیندسي گراهام ويلي، د امريکا او طالبانو ترمنځ د شوې هوکړې له مخې به امريکايي سرتېري په ټاکل شوې موده « د روان ميلادي کال مې مياشت» کې له افغانستانه ونه وځي.
د لویې څارنوالۍ ویاند جمشېد رسولي وايي، د اداري فساد له لویو جرمونو سره د مبارزې عدلي او قضايي مرکز ابتدایه محکمې د بلخ پخوانی ښاروال محمد نصیر عیني له وظیفوي واک څخه د ناوړه ګټې اخيستنې په تور په یوه کال او شپږ میاشتو تنفیذي بند محکوم کړی دی.
افغانستان له هنده د کورونا واکسین لومړۍ جوپه ترلاسه کړه. د کورونا واکسین دغه بسته ۵۰۰ زره ډوزه ده؛ خو تراوسه يې د نړيوال روغتيايي سازمان تاييدي نه ده ترلاسه کړې.
د عامې روغتیا وزارت سرپرست وحيدالله مجروح د ياد واکسين د ترلاسه کولو پر مهال د حامد کرزي نړيوال هوايي ډګر کې رسنیو ته وويل، ټاکل شوې چې په دې شمېر واکسین سره ۲۵۰ زره افغانان واکسین شي.
له دوو ورځو را په دې خوا د کابل د شهزاده سرای چې د بهرنیو اسعارو د تبادلې او را کړې ورکړې لوی بازار دی د صرافانو د کاري پرلت پر بنسټ تړل شوی دی. صرافان وایی دوی نه غواړي چې شرکتونه جوړکړي او جواز یې شرکتي وي؛ خو د افغانستان بانک بیا وایي چې دا کار د دوی په ګټه دی او په دې سره د تورو پیسو د مینځلو مخنیوی کېږي؛ نو باید ټول صرافان تجارتي جوازونه ترلاسه کړي چې صرافان یې نه مني.
د ننګرهار چارواکي وايي، نن سهار شاوخوا پنځه بجې د ننګرهار ولایت د خوږیاڼو ولسوالي اړوند په چمتلې سیمه کې د پولیسو پر یوې پوستې موټربم برید شوی چې تر اوسه ترې د یوه سرتېري د وژل کېدو او دوو نورو د ټپي کېدو خبر ورکړل شوی دی.
د ننګرهار ولایت د رسنیو دفتر د دغه خبر پخلی کړی او لیکلي یې دي چې ياد موټربم د یوه سراچه موټر په وسیله چې چاودېدونکي توکي پهکې و، شوی دی.
لویه څارنوالي وايي، د اداري فساد درنو جرمونو پر وړاندې د عدلي او قضايي مرکز ابتداییه محکمې د مشرانو جرګې درې سناتوران په یوه علني محکمه کې په بند محکوم کړي دي.
د لویې څارنوالي له لوري په خپره شوې خبرپاڼې کې لیکل شوي چې په یاده محکمه کې د مشرانو جرګې غړي لیاقتالله بابکرخېل، محمدانور باشلیق او عظیم قویاش په لس کاله او یوه میاشت تنفیذي بند او ۴۰ زره ډالره نغدي جریمې محکوم شوي دي.
د ننګرهار چارواکي وايي چې نن له غرمې وروسته نږدې یوه بجه د دغه ولایت په کامې ولسوالي کې ټرافیکې پېښه شوې چې له کبله یې درې کسان مړه او درې نور ژوبل شوي دي.
د ننګرهار د والي ویاند عطاالله خوږیاڼي سلاموطندار ته وویل چې یاده پېښه د کامې ولسوالي په اخوند کلا سیمه کې د یوې هېنو او رېکشا د ټکر له امله شوې ده.
کابل ښار نن له دوه ساعتونو کمه موده کې د درې چاودنو شاهد و. د کابل امنيې قومندانۍ وايي، يادو چاودنو کې ۲ ملکيان او نظامي کس وژل شوي او ۵ ملکي وګړي ټپيان شوي دي.
د امنيې قومندانۍ په وينا، لومړۍ چاودنه سهار شاوخوا ۹ بجې د کابل لومړۍ امنيتي حوزې باغ قاضي سيمه کې په يوه دوکان کې وشوه. پوليسو پيل کې وويل چې په دې چاودنه کې د ۳ سکانو په ګډون ۶ کسان ټپيان شوي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
