د ننګرهار چارواکي وايي، نن سهار شاوخوا پنځه بجې د ننګرهار ولایت د خوږیاڼو ولسوالي اړوند په چمتلې سیمه کې د پولیسو پر یوې پوستې موټربم برید شوی چې تر اوسه ترې د یوه سرتېري د وژل کېدو او دوو نورو د ټپي کېدو خبر ورکړل شوی دی.
د ننګرهار ولایت د رسنیو دفتر د دغه خبر پخلی کړی او لیکلي یې دي چې ياد موټربم د یوه سراچه موټر په وسیله چې چاودېدونکي توکي پهکې و، شوی دی.
د معلوماتو له مخې، په دغه برید کې د شاوخوا سيمې خلکو ته هم مالي زیانونه اوښتي او ښايي د اوښتې مرګژوبلې شمېرو کې هم بدلون راشي.
عام خلک وايي، د چاودنې غږ دومره دروند و چې د جلالاباد ښار په ځینو برخو کې هم اورېدل شوی دی.
بلهخوا د ننګرهار د امنيې قومانداني وياند فريد خان وايي، نن سهار شاوخوا نهه بجې د جلالاباد ښار د درېيمي ناحیې په اړوند سيمه کې د درېيمي امنيتي حوزې د پوليسو پر یوې رېنجرې باندې د سړک غاړې ماين چاودنه شوې ده.
د نوموړي په وینا، په چاودنه کې د دغې حوزې دوه سرتېري ټپيان شوي دي. ویل کېږي چې په دغو چاودنو کې درې ملکیان هم ټپیان شوي، خو تر اوسه په رسمي ډول د ملکیانو ټپي کېدل نه دي تایید شوي.
تر اوسه د دغو بريدونو مسوولیت کومې وسلهوالې ډلې نه دی منلی.
دا په داسې حال کې ده چې په دې وروستیو کې له ننګرهار نه هم د چاودنو، هدفي وژنو او ترورونو خبرونه ډېر شوي او نږدې هره ورځ پهکې بېلابېلې امنیتي پېښې کېږي.
