د ملګروملتونو د بشري مرستو د همغږۍ ادارې «اوچا» وايي، افغانستان کې د اړمنو ژوند ژغورلو لپاره د غوښتل شویو درې میلیارد او ۶۰میلیونه ډالرو څخه یې یوازې ۷.۸سلنه ترلاسه کړي.
دغه سازمان پرون چهارشنبه، مې دویمه ویلي، د بودیجې کمښت په دلیل یې افغانستان سره د بشري مرستو کچه کمه کړې.
د سلاموطندار پښتو فېسبوکپاڼه وڅارئ
د اوچا د رپوټ یوه برخه کې ویل شوي: «که غوښتل شوې بودیجه تامین نهشي، افغانستان کې به زیانمن کسان په ځانګړې توګه ښځې، ماشومان او ډېر عمرلرونکي له سخت وضعیت سره مخ شي.»
په ورته مهال د سرپرست حکومت د اقتصاد وزارت مسوولان افغانستان سره د بشري مرستو د دوام غوښتنه کوي.
د دغه وزارت ویاند عبدالرحمان حبیب سلاموطندار ته وویل، نړیوال بنسټونه دې افغانستان کې د کاري فرصتونو برابرولو په برخه کې پانګونه وکړي.
هغه وویل: «اغېزمنو سیمو کې بشردوستانه مرستو دوام کولای شي، اړمنو ته اقتصادي ګټه ولري، خو غوښتنه مو دا ده چې نړیوال بنسټونه دې پر پراختیايي پروژو کار وکړي چې د کار زمینه برابره کړي.»
له دې سره، د اقتصادي مسایلو یوشمېر کارپوهان هېواد کې د لوږې په دلیل د مړینې مخنیوي لپاره د نړیوالو د بشري مرستو پر دوام ټینګار کوي.
د اقتصادي چارو کارپوه اذرخش حافظي وویل: «د حکومت په بدلېدو سره مرستې کمې شوي او پراختیايي پروګرامونه درېدلې دي او هر کال یو میلیون وګړي د افغانستان نفوس کې وراضافه کېږي او یوازینۍ وسیله چې خلکو سره مرسته کولای شي، بشري مرستې دي.»
د ملګروملتونو د بشري مرستو د همغږۍ ادارې د رپوټ پر اساس، روان ۲۰۲۴ کال کې به شاوخوا ۲۳.۷ میلیون کسان بشري مرستو ته اړتیا ولري.