د ننګرهار د رسنیو دفتر وايي چې ناپېژنده کسانو بېګاه د دغه ولایت په مومندرې ولسوالي کې د «سولې او ازادۍ» سوداګریز انسټېټیوټ سوځولی او تښتېدلي دي.
د ننګرهار د رسنیو دفتر د معلوماتو له مخې، په دې پېښه کې د یاد انسټېټیوټ دوه ټولګي او تجهیزات سوځېدلي او په وینا یې، مسوولو کسانو لګول شوی اور مړ کړی او د عاملانو د پېژندنلو او نیولو هڅې یې روانې دي.
د ننګرهار والي د رسنیو دفتر د دغه کار عاملان د پوهې او پرمختګ دښمنان بللي او په وینا یې، له نیولو وروسته به یې د قانون منګولو ته وسپاري.
د سولې او ازادۍ انسټېټیوټ د ننګرهار د مومندرې ولسوالي په ډکه سیمه کې و چې سلګونو کسانو پهکې زدهکړې کولې.
تر اوسه کوم چا یا ډلې د دغه انسټېټیوټ د سوځولو مسوولیت پر غاړه نه دی اخیستی.
دا په داسې حال کې ده چې شاوخوا دوه کاله وړاندې هم په همدې ولسوالي کې د اېملخان بابا ښوونځی هم د ناپېژنده کسانو له لوري سوځول شوی و.