د ملګرو ملتونو سرمنشي انټونیو ګوټرېش ویلي چې افغانستان کې له شپږم ټولګي د پورته نجونو د ښوونځیو تړلي پاتې کېدل د حقونو د برابروالي اصل نقض دی او په هېڅ ډول توجیه کېدای نهشي.
نوموړي نن پر ټویټر لیکلي چې په افغانستان کې نجونې لا هم له زدهکړو بېبرخې دي. هغه ټینګار کړی چې د افغان نجونو ذهن او روان له ښوونځي سره تړلي دي.
د اسلامي امارت چارواکي وايي، هېواد کې د وروستیو سېلابونو له کبله د اوښتو زیانونو د جبران لپاره له ۳۰۰ میلیونه ډېرو ډالرو ته اړتیا ده.
د بهرنیو چارو وزارت نن د وروستیو سېلابونو له کبله د اوښتو زیانونو د جبران لپاره د نړیوالو مرستو د را ټولولو لپاره د نړیوالو مرستندویه سازمانونو او یوشمېر سفارتونو په ګډون یوه غونډه را بللې وه.
د روزګان محلي مسوولان وايي چې یوه ملکي وګړي د دغه ولایت په خاص روزګان ولسوالي کې د اسلامي امارت پر غړیو ډزې کړي چې له کبله یې د ا.ا دوه غړي وژل شوي او دوه ملکیان هم ټپیان شوي دي.
د تخار د امنیې قومانداني ویاند عبدالمبین ساپي سلاموطندار ته ویلي چې یو سړی او یوه ښځه یې له کوره د تېښتې او نامشروع اړیکې په تور نیولي دي.
د نوموړي په وینا، دغه کسان نن سهار د تخار د مرکز تالقان ښار په «آقمسجد» سیمه کې نیول شوي دي.
د روسیې رسنیو خبر ورکړی چې د پخواني شوروي اتحاد وروستی مشر میخایل ګورباچوف د روانې اګېسټ میاشتې په دېرشمه، د سهشنبې ورځ د ۹۱ کلونو په عمر د روسیې په مرکز مسکو کې مړ شوی دی.
د روسي رسنیو د راپور له مخې، نوموړی «د اوږدې او سختې ناروغۍ» له کبله د مسکو په مرکزي روغتون کې مړ شوی دی.
افغانستان له سریلانکا وروسته بنګلهدېش ته هم په اوو ویکټو ماتې ورکړه. د افغانستان کرېکټ ملي لوبډلې د اسیا کپ سیالیو کې نن د بنګلهدېش له لوبډلې سره مخامخ شوه چې یادې لوبډلې په ۲۰ اورونو کې افغانستان ته د ۱۲۸ منډو هدف وټاکه. د افغانستان کرېکټ ملي لوبډلې دغه هدف په نولسم اوور کې پوره او په دې سره یې په اوو ویکټو بنګلهدېش ته ماتې ورکړه.
د هرات امنیه قومانداني وايي، پولیسو د دغه ولایت د مرکز په شپږمه امنیتي حوزه کې هغه ښځه لاس په لاس نیولې چې غوښتل یې خپل خاوند ووژني.
د امنیې قومانداني په یوه خبرپاڼه کې لیکلي چې یادې ښځې او خاوند یې مخکې په محکمه کې حقوقي دعوا لرله او خاوند یې چې کله د محکمې جلب د خُسر کور ته ور وړی، مېرمنې یې په چاکو وهلی دی.
د سوداګرۍ او صنایعو وزارت سرپرست نورالدین عزیزي نن ملت ته د دولت د حساب ورکولو غونډه کې وویل چې په نږدې راتلونکې کې به د افغان سوداګرو یو پلاوی د افغانستان کورنیو تولیداتو لپاره د بازارموندنې په موخه روسیې، اوزبکستان او قزاقستان ته ولاړ شي.
د هلمند په مرکز لښکرګاه ښار کې ګڼشمېر هټۍوال وايي، له یوې خوا یې د تېر په پرتله سودا کمه شوې او بلهخوا پرې حکومت ټکس او مالیه لوړه کړې ده. د دوی په وینا، دغه وضعیت یې له ۵۰ تر ۷۰ سلنه ګټه وټه کمه کړې ده. یو هټۍوال محمدولي محمدي وايي چې د هلمند مستوفیت ترې ډېره مالیه ټولوي.
د امریکا د پوځ مرکزي قوماندانۍ یا سنټکام پخوانی قوماندان جنرال فرانک کنټ مکېنزي وايي، امریکايي ځواکونه ښايي یو ځل بیا افغانستان ته ستانه شي.
رسنیو نن د مکېنزي له قوله لیکلي چې نوموړي تېر اوړی د امریکا متحده ایالاتو ولسمشر جو بایډن ته خبرداری ورکړی و چې د امریکا په بشپړ شاتګ سره به افغان دولت وپرځېږي.
هرات کې ۲۰۰ کارګر ماشومان چې له زدهکړو بېبرخې وو، نن د یوه خیریه بنسټ په همکاري ښوونځي کې شامل شوي دي.
د «عاطفي» په نوم د دغه بنسټ مرستیال عبدالظاهر ارشاد وايي، نن یې ۸۷ نجونو او ۱۱۳ هلکانو ته د زدهکړو اسانتیاوې برابرې کړې دي.
د اسیا کپ د روانو سیالیو دویمه لوبه نن د هند او پاکستان ترمنځ په متحده عربي اماراتو کې وشوه. هند او پاکستان په کرېکټ کې تل یو د بل سرسخت سیالان بلل کېږي.
هند د دې لوبې پچه وګټله او پاکستان ته یې د منډو کولو بلنه ورکړه چې پاکستان د خپلو ټولو لوبغاړیو په سوځېدو سره په شلم اوور کې هند ته د ۱۴۹ منډو هدف وټاکه. دا د اسیا کپ دویمه سیالي وه.
تېره ورځ یو کس چې ادعا یې کوله د اسلامي امارت د کورنیو چارو وزارت د ښاري استخباراتو د څانګې کارکوونکی دی، د سلاموطندار راډیو دفتر ته ننوځي. نوموړي کس غوښتل په زور او د سلاموطندار راډیو د امنیتي برخې له همغږۍ پرته دفتر ته دننه شي. هغه خپل ځان عبدالمالک صافی معرفي کړ او یوه بل ځوان یې هم ملتیا کوله.
اسیا کې له خبریالانو د خوندیتوب کمېټې په یوې خبرپاڼه کې د سلاموطندار راډیو پر خبریال او اډېټور محمدعلي احمدي وسلهوال برید افغانستان کې د اطلاع رسونې پر وړاندې ستر ګواښ بللی دی. اسیا کې د خبریالانو خوندیتوب کمېټې همغږی کوونکی سټیوان بټلر له طالبانو غوښتي چې د یاد برید د څرنګوالي په اړه خپلې څېړنې پیل کړي.
د سلاموطندار راډیو خبریال او د متن اډېټور محمدعلي احمدي د روانې اوونۍ د شنبې په ورځ له دفتر څخه کور ته پر لار و چې د یوه وسلهوال برید لاندې راغی او په دې برید کې یې یوه پښه ژوره تپي شوې ده. تراوسه روښانه نه ده چې دغه برید د کومې ډلې له لوري شوی دی.
له هرات وروسته د کابل، خوست، تخار، ننګرهار او بدخشان ولایتونو ډېری اوسېدونکو د افغان ځواکونو په ننګه او له طالب ډلې د کرکې په موخه د «الله اکبر» نارې وکړې. خلک داسې مهال واټونو ته راووتل چې په یوشمېر ولایتونو کې جګړې زور اخیستی او طالبانو د څو ولایتونو په ښارونو کې د جګړې سنګر تود ساتلی دی.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
