د بغلان د ولایتي شورا غړی سمېعالله ناظر وايي، د دغه ولایت د دوشي ولسوالي د «کیلهګي ښوونځي» په سیمه کې د ولسي جرګې د پخواني غړي او د اسماعیلیانو د خلکو شورا د عمومي رییس سیدداوود نادري پر موټر د سړک غاړې ماین چاودنه شوې او ورپسې د طالبانو له کمین سره مخ شوی دی.
د نوموړي په وینا، په دې پېښه کې د نادري څلور ساتونکي وژل شوي او پنځه نور ټپیان دي. هغه زیاتوي، دا پېښه نن غرمه هغه مهال شوې چې سیدداوود نادري د اسماعیلیانو له یوشمېر نورو مشرانو سره پلخمري ښار ته راشي.
د سلاموطندار پښتو فېسبوکپاڼه وڅارئ
د بغلان د ولایتي شورا دغه غړی وايي، په پېښه کې نوموړي ته زیان نه دی اوښتی او بېرته دوشي ولسوالي ته ګرځېدلی دی. هغه زیاتوي چې ټول امنیتي مسوولانو ته یې د سفر په اړه خبر ورکړی و، خو هغوی یې د امنیت په ټینګښت کې بېپروايي کړې ده.
په همدې حال کې امنیتي سرچینې وايي چې طالبانو د سیدداوود نادري د ساتونکو وسلې او تجهیزات وړي او د نوموړي د خپل سفر په اړه هم امنیتي ادارو ته څه نه و ویلي.
سلاموطندار پر ټویټر هم وڅارئ
ومو غوښتل چې په دې اړه د بغلان د امنیتي او محلي مسوولانو نظر هم واخلو، خو هغوی په دې اړه خبرو کولو ته حاضر نه شول.
طالبانو تر اوسه په دې اړه څه نه دي ویلي.
