کابل کې نن د لومړي ځل لپاره د افغان مېرمنو د صنعت او سوداګرۍ خونې له لوري د (اختر بازار) په نوم نندارتون پرانیستل شو.
د دغه نندارتون مسوولانې وایي دا د اسلامي امارت له واکمنۍ وروسته د ښځو لومړنی نندارتون دی چې د ښځو په مشرۍ جوړېږي.
د دغه نندارتون جوړوونکې رویا حافظي وایي، په دغه نندارتون کې ۷۰ غرفې چې زیاتره یې لاسي صنایع دي نندارې ته وړاندې شوې دي.
رویا حافظي وایي چې د دغه ډول نندارتونونو جوړل د سوداګرۍ ودې او د افغاني تولیداتو ملاتړ په ځانګړي ډول د ښځیه سوداګرو د کار پراختیا لپاره ګټور دی.
په همدې حال کې سوداګرې میرمنې له هېوادوالو څخه غواړي چې د ښځو له سوداګرۍ څخه د ملاتړ په موخه دې د مېرمنو له تولیداتو استفاده وکړي.
سعيده غزنيوال چې سوداګره ده وايي، په تېرو نهو مياشتو کې د سوداګريزو فعاليتونو بندېدل او د نندارتونونو نه جوړېدل د ښځو د سوداګرۍ د ودې مخه ډب کړې خو اوس هغه وخت رارسېدلی چې افغان میرمنې د صنعت او سوداګرۍ په برخه کې د سیمې او نړۍ په کچه خپلو کارونو ته پراختیا ورکړي.
د سلاموطندار پښتو فېسبوکپاڼه وڅارئ
مېرمن غزنیوال وایي: « له خپلو درنو هېوادوالو څخه هیله کوو چې د دغو مېرمنو له محصولاتو څخه واخلي څو وکولی شو پر ځان بسیا واوسو. که چېرې د خپلو سوداګرو محصولات واخلئ هېواد به پرمختګ لوري ته روان شي.»
د یادونې وړ ده چې د افغاني تولیداتو او لاسي صنایعو لپاره د بازار نشتون د ښځو د سوداګرۍ په برخه کې له اساسي ستونزو څخه شمېرل کېږي.
