د کابل-جلالاباد لویه لاره د ماهیپر اړوند سیمه کې د ګازو د یوه ټانکر موټر د چپهکېدو له کبله د ټرافیکو پر مخ تړل شوې ده.
د ټولګټو وزارت نن دوشنبه د کب اتمه په یوې خبرپاڼه کې ویلي چې د یادې لویې لارې د پرانېستلو هڅې روانې دي.
د دغه وزارت په خبرپاڼه کې راغلي چې د ماهیپر د ساتنې او څارنې پرسونل سیمه ته رسېدلی او ډېر ژر به دغه لاره بېرته پرانېستل شي.
په خبرپاڼه کې د یادې پېښې له امله د مرګژوبلې په اړه څه نه دي ویل شوي.
د کابل-جلالاباد لویه لاره د هېواد له مهو لارو څخه شمېرل کېږي چې ختیځ څلور ولایتونه له پلازمېنې سره نښلوي.
سلاموطندار پر ټویټر هم وڅارئ
له دې وړاندې هم یاده لویه لاره د موټرو ټکر او سېلابونو راوتلو له امله په وار وار تړل شوې چې له څو ساعته ځنډ وروسته بېرته پرانېستل شوې ده.
