جاپان او د ماشومانو لپاره د ملګروملتونو ملاتړې (یونېسف) نن سهشنبه، سلواغې ۲۱مه، کابل کې یو هوکړهلیک لاسلیک کړ چې موخه یې، د هېواد په ۳۴ ولایتونو کې د واکسینونو تطبیق دی.
په کابل کې د جاپان سفیر، ماساموتو کنیچي وايي، هېواد یې د جاپان د نړیوالو همکاریو ادارې (جایکا) له لارې له ۶.۲۶ میلیونو ډالرو څخه زیاتې مرستې دې کمپاین ته ځانګړې کړې او دا پروژه به د یونېسف له لوري عملي شي.
د جاپان سفیر په دې غونډه کې وویل: «جاپان پرېکړه کړې چې د جایکا له لارې له ۶.۲۶ میلیونو ډالرو څخه زیاتې مرستې دې پروژې ته ځانګړې کړي چې له همدې میاشتې به د یونېسف له لوري تطبیق شي. د دې پروژې موخه دا ده چې د افغانستان په ټولو ۳۴ ولایتونو کې د ورځني واکسین او ملي کمپاینونو لپاره د پولیو خوراکي واکسینونه په بېوقفه ډول برابر شي.»
د یونېسف مسوولان وايي، د دې مرستې پرمټ به تر پنځو کلونو کم عمره له ۱۷ میلیونو څخه زیات ماشومان واکسین شي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
په افغانستان کې د یونېسف مرستیالې اندریا جیمز وايي: «د جاپان حکومت نن له موږ سره یو تفاهملیک لاسلیک کړ، چې له مخې به د پولیو پر وړاندې د مبارزې او د واکسین د تطبیق لپاره له ۶.۲۶ میلیونو ډالرو څخه زیاتې مرستې وکړي. د دې مرستې له لارې به تر پنځو کلونو کم عمره له ۱۷ میلیونو څخه زیات ماشومان واکسین ترلاسه کړي.»
په دې پروګرام کې د جاپان د نړیوالو همکاریو ادارې (جایکا) مسوولانو هم ګډون کړی وو.
دوی په یاده غونډه کې وویل چې د دې هوکړې پربنسټ به جایکا له یونېسف سره د پولیو پروړاندې د مبارزې او د ورځني واکسین د لاپیاوړتیا په برخه کې خپلې همکارۍ ته دوام ورکړي، څو ډاډ ترلاسه شي چې ماشومان په عادلانه ډول د خوندي او باکیفیته واکسین خدمتونو ته لاسرسی لري.
سوتا توساکا وویل: «په افغانستان کې د پولیو له منځه وړل ممکن دي. زه په رښتیني ډول هیله لرم چې دا نوښت به د دې مهم هدف په ترلاسه کولو کې مرسته وکړي او د افغانستان د ټولو خلکو هوساینه به لوړه کړي.»
د یادونې وړ ده چې جاپان په ۲۰۲۶کال کې شاوخوا ۲۰ میلیونه ډالره مرستې له افغانستان سره اعلان کړي چې دا مرستې به په بېلابېلو برخو کې ولګول شي.
