د هرات محلي مسوولان وايي چې په دغه ولایت کې د اسلامي امارت ځواکونو یوه رنجر موټر له ټېلر سره ټکر کړی چې له امله یې د اسلامي امارت پنځه سرتیري مړه شوي دي.
د سرچینې په وینا، په دغه ټرافیکي پېښه کې یوشمېر کسان ټپیان شوي هم دي؛ خو کره شمېره یې نه ده روښانه. په ورته وخت کې سرچینه زیاتوي چې دغه پېښه د رنجر او ټېلر موټر چلوونکو له لوري د بې احتیاطۍ له کبله رامنځته شوې ده.
بلخوا د هرات روغتیايي مسوولان وايي چې د پېښې له ځای څخه د یاد ولایت حوزوي روغتون ته د اسلامي امارت د سرتیرو دوه مړي وروړل شوي دي.
د هرات د حوزوي روغتون سرطبیب عارف جلالي سلاموطندار ته وايي چې د پېښې ځای ته یې د ټپیانو د لېږد لپاره امبولانسونه لېږلي دي.
د اسلامي امارت محلي مسوولانو تراوسه په دې اړه څه نه دي ویلي.
دا په داسې حال کې ده چې له دې وړاندې هم د هېواد په یوشمېر ولایتونو د موټر چلوونکو د تېز رفتارۍ او بېاحتیاطۍ له امله ټرافیکي پېښې رامنځته شوي چې ګڼشمېر خلکو ته یې مرګژوبله اړولې ده.
