د پروان د برښنا ریاست مسوولان وايي، د ولسمشرۍ ماڼۍ لومړي معاونیت د کابل په شمال کې د برښنا پایو د الوځولو ډېروالي ته په کتو د یادو پایو د چپه کولو مخنیوي غونډه کې دا موضوع ارزولې ده.
د پروان د برښنا رییس روحالله ساجد سلاموطندار ته ویلي چې په یاده غونډه کې د پایو چپه کولو د مخنیوي په غونډه کې پر بېلابېلو لاروچارو بحث شوی او په پای کې پرېکړه شوې چې لپاره یې ساتونکي وګومارل شي.
د سلاموطندار پښتو فېسبوکپاڼه وڅارئ
د نوموړي په وینا، د هرې پایې د ساتنې لپاره دوه ساتونکي په پام کې نیول شوي چې د ولسمشرۍ ماڼۍ له بودیجې او ولسوالیو د امنیې قوماندانیو له لارې به د میاشتې پنځه پنځه زره افغانۍ ورکړل شي. هغه زیاتوي، اوس ټولټال ۱۸۴ پایې دي او دا پرېکړه په سوېلي سالنګ کې د دوو هغو له چپه کېدو وروسته شوې ده.
- اوزبکستان او تاجکستان افغانستان ته خپله صادراتي برښنا کمه کړې
- د برښنا نشتوالي په اړه د کابل ښاریانو شکایت
- د برښنا د لګښت پیسو ډېروالي په اړه د کابل ښاریانو شکایت
په همدې حال کې د پروان ولایت د سالنګ ولسوال اغاشېرین ندیم وايي، ورته د رسېدلو لارښودونو له مخې، د ولسوالیو امنیه قوماندانانو یاد ساتونکي ګومارلي او مدیریت یې هم د کشفي او امنیتي ادارو پر غاړه دی.
هغه وايي، په سالنګ ولسوالي کې د برښنا د لوړ ولټاژ ۲۲۰ کیلو ولټه برښنا ۸۱ پایې شته او ۱۶۲ ساتونکي ورته ګومارل شوي او په وینا یې، پیسې هم برښنا شرکت ورکوي.
که څه هم د برښنا پایو د ساتنې لپاره ساتونکي ګومارل شوي، خو بیا هم په دوو بېلابېلو پېښو کې د برښنا پایې چپه شوې دي. په لومړۍ پېښه کې په سالنګ ولسوالي کې د برښنا یوه پایه او په بله کې یې هم چې بېګاه وشوه، د یادې ولسوالي په رباط سیمه کې د برښنا یوه پایه چپه شوه او له کبله یې د کابل په ګډون، د شاوخوا لسو ولایتونو برښنا پرې شوه.
د مسوولو سرچینو د معلوماتو له مخې، د کابل له خیرخانې کوتل نه د سوېلي سالنګ تر تونل پورې د برښنا ۱۸۴ پایې دي.
