د ولسمشر لومړی مرستیال امرالله صالح وايي، طالبانو د ده د ترور پلان درلود، خو د ملي امنیت ریاست یې مخه نیولې ده.
نوموړي نن د کابل د امنیتي وضعیت په اړه پر خپلې فېسبوکپاڼې لیکلي چې د ملي امنیت عمومي ریاست هغه ۱۶ نښه شوې سیمې پېژندلي چې د طالبانو غوښتل د ده د تګراتګ لارې په اوږدو کې پر یو وخت پهکې بمونه کېږدي.
هغه د روان کال په وږي میاشت کې پر ده شوي برید ته په اشارې ویلي، که څه هم د یاد برید مسوولیت طالبانو ونه مانه، خو هغه شبکه چې د ملي امنیت عمومي ریاست له لوري نیولې شوې، ښيي چې دا کار د هغو طالبانو و چې له لشکر طیبه ډلې سره یې چې اوس په جیش محمد یادېږي، نږدې او ګډ کار کاوه.
د نوموړي په وینا، دوو نیول شویو کسانو اعتراف کړی چې د ولسمشر د لومړي مرستیال محمدسرور دانش او د افغانستان د اسلامي وحدت ګوند د مشر محمدکریم خلیلي د تګراتګ لوري د په نښه کولو په هڅه کې هم وو.
صالح وايي، د دې ډلې د مشر قاري سعید د نیولو په برخه کې د ملي امنیت هڅې تر اوسه بریالۍ نه دي.
د سږ کال په وږي میاشت کې د کابل ښار په تایمني سیمه کې د ولسمشر د لومړي مرستیال د موټرو پر کاروان برید وشو. په دې پېښه کې ۱۰ کسان ووژل شول او ۱۵ نور چې د هغه ساتونکي هم پهکې وو، ټپیان شول.
