رویټرز خبري اژانس خبر ورکړی چې د افغانستان بانک ډالري زېرمې د پخواني حکومت له سقوط څو اوونۍ مخکې په خلاصېدو وې. رویټرز د هغو راپورونو پر بنسټ چې د افغانستان نړیوالو ملاتړو ته جوړ شوي وو، ویلي چې په افغانستان بانک کې د نغدو پیسو د کموالي او اقتصادي ناورین لامل د بانک د مخکیني مشرتابه کمزوری مدیریت و.
په دغه راپور کې چې د نړیوال اقتصاد د لوړپوړو چارواکو له لوري لیکل شوی، د کابل تر سقوط وړاندې د افغانستان بانک پر مدیریت، د ډالرو لیلامولو او له مرکز نه ولایتي څانګو ته د ډالرو پر لېږد نیوکه شوې ده.
د سلاموطندار پښتو فېسبوکپاڼه وڅارئ
د یاد راپور پر بنسټ، په ځینو ولایتي څانګو کې څهناڅه پیسې پټې شوې دي. د افغانستان بانک مخکینيو او اوسنیو مسوولانو په دې اړه د سلاموطندار پوښتنې ځواب نه کړې.
خو په پخواني حکومت کې د افغانستان بانک د کورنۍ پلټنې د کمېټې رییس شاهمحمد محرابي چې اوس هم پر یاد بست کار کوي، له رویټرز سره په خبرو کې د دغه بانک د اقداماتو دفاع کړې او ویلي یې دي چې د افغانستان بانک د افغانیو د ډېروالي مخنیوي هڅه کوله.
د افغانستان بانک مخکیني رییس اجمل احمدي په وروستیو اوونیو کې پر ټویټر لیکلي و چې ټولې هڅې یې د وضعیت د مدیریت لپاره کړي او په بانک کې له هېڅ اکونټ نه پیسې نه دي پټې شوي.
