یوشمېر ښځینه مدافع وکیلانې وايي، له تېر یونیم کال راهیسې خپلې دندې ته د نه پرېښودو له کبله اقتصادي او رواني ستونزو سره مخ شوې دي.
یوې مدافع وکیلې زهره عزیزي سلاموطندار ته وویل: «له بده مرغه د اسلامي امارت په راتلو سره او د محدودیتونو له امله له ناوړه وضعیت سره مخ یم، له اقتصادي، روحي او رواني پلوه ستونزو سره مخ یم.»
په ورته مهال یوه بله مدافه وکیله چې د اسلامي امارت له واکمنېدو سره هممهاله کورناستي ته اړ شوې، وايي چې د ژوند دوام لپاره اړ ده، څو د خپل کور توکي وپلوري.
هغې وویل: «مال او دارايي مې پلورم او خپل ژوند مې مخکې پرې وړم، خاوند مې وزګاره دی، عاید نهلرو. د کار په لټه ګرځو، خو کار هم نشته، د کور وسایل مې وپلورل او ژوند پرې مخکې وړم.»
په ورته وخت کې د حقوقپوهانو ټولنې پخوانی مرستیال سبحان مصباح وايي، د ښځو اړوند دوسیو مخته وړو په برخه کې د عدالت تامینولو لپاره د ښځینه مدافع وکیلانو حضور اړین دی.
د نوموړي په وینا، د عدالت ټينګښت، د قانون حاکمیت او بنسټییزو حقونو ته لاسرسي برخه کې د مېرمنو شتون مهم دی.
بلخوا د عدلیې وزارت ویاند عبدالحمید جهادیار وویل، د مېرمنو لپاره د مناسب کاري چاپېریال او د بودیجې نه درلودو له امله د ښځینه مدافع وکیلانو د فعالیت جواز نه دی تمدید شوی.
هغه سلاموطندار ته وویل: «کاري بودیجه نه ده برابره شوې. که زمینه یې برابره شي، تمدید به شي او موضوع د اسلامي امارت مشرتابه پورې اړه لري.»
د یادونې وړ ده چې د مخکیني جمهوري نظام سقوط سره، ښځې د حقوقي برخې په ګډون بېلابېلو ادارو کې کار کولو څخه منع شوې دي.
سلاموطندار پر ټویټر هم وڅارئ
د مدافع وکیلانو د ټولنې شمېرو پر بنسټ، د جمهوري نظام له سقوط وړاندې یو زر او ۵سوه ښځو له دغې ټولنې څخه د فعالیت جواز اخیستی وو.
