د ماشومانو لپاره د ملګرو ملتونو ملاتړې ادارې یا یونېسف په خپل تازه راپور کې ویلي چې د افغانستان په خوست او پکتیکا ولایتونو کې د شوې زلزلې له امله ۱۵۵ ماشومان مړه او نږدې ۲۵۰ نور تپیان شوي دي.
د راپور پربنسټ، دغو ولایتونو کې په شوې زلزله کې ۳۶۲ زره کسان چې ۱۹۰ زره يې ماشومان دي، زیانمن شوي دي.
د سلاموطندار پښتو فېسبوکپاڼه وڅارئ
د یونېسف د راپور له مخې، په خوست او پکتیکا ولایتونو کې شوې زلزلې ګڼ کورونه، روغتیايي مرکزونه، ښوونځي، د اوبو رسولو سېسټمونه او نورې مهمې برخې له منځته وړي او یاد ولایتون کې د وروستیو ورځو پرمهال ګرمي هم زیاته شوې ده.
په همدې حال کې، یونېسف په یاد راپور کې ټینګار کړی چې اوس په خوست او پکتیکا ولایتونو کې د ۱۲روغتیايي مرکزونو او ۹ ګرځنده ټیمونو له لارې خلکو ته روغتیايي خدمات وړاندې کوي.
بلخوا د پکتیکا د ګیان او برمل ولسوالیو اوسېدونکې سلام وطندار ته وايي چې په سیمو کې یې د ماشومانو روغتیايي وضعیت د اندېښنې وړ دی.
د دوی په خبره، تر زلزلې وروسته د څښاک پاکې اوبه خرابې شوي چې له امل ګڼشمېر ماشومان په اسهالاتو اخته شوي دي. د یادو ولسوالیو اوسېدونکي د ماشومانو روغتیايي وضعیت ته په کتو سره د بېړنیو مرستو غوښتنه کوي.
ومو غوښتل چې په خوست او پکتیکا ولایتونو کې د شوې زلزلې له امله ماشومانو ته د اوښتو زیانونو په اړه د یونېسف تازه راپور په تړاو د عامي روغتیا وزارت د مسوولانو نظر هم له ځان سره ولرو، خو له هڅو سره سره بریالي نهشو.
یونېسف د ماشومانو د کورنیو د غړو مړینه، د څښاک پاکو اوبو او سرپناه نهشتون، هغه ستونزې یادوي چې په وینا يې، ماشومان ورسره مخ دي.
سلاموطندار پر ټویټر هم وڅارئ
له دې وړاندې هم د ماشومانو څخه د ملاتړ یوې موسسې تر زلزلې وروسته د ماشومان د ارواحي وضعیت خرابیدو په اړه اندېښنه ښودلې وه.
