د هلمند مسوولان وايي، تېره اوونۍ په دغه ولایت کې د بېلابېلو ۱۳ ټرافيکي پېښو له کبله ۲۹ کسانو ته مرګژوبله اوښتې ده.
دا پېښې د هلمند په بېلابېلو برخو او ولسوالیو کې شوې دي.
د هلمند د اطلاعاتو او کلتور ریاست مرستیال محمدقاسم ریاض سلاموطندار ته ویلي چې یادې ټرافیکې پېښې په باباجي، ناوې، مارجې، ګرشک او سنګین ولسوالیو کې شوي چې له کبله یې ۵ کسان مړه او ۲۴ نور ټپیان شوي دي.
د دغو پېښو لامل د موټرچلوونکو بېاحتیاطي او ګړندی تګ بلل شوی دی.
