د بغلان د ټرافیکو مدیریت مسوولان وايي چې دغه ولایت کې د یوې ټرافیکي پېښې پر مهال څلور کسان مړه شوي او یو بل کس ټپي دی.
د بغلان د ټرافیکو مدیریت د پېښو امر صفيالله عمري سلاموطندار ته ویلي چې پېښه پرون پنجشنبه د غويي ۲۸مه د «نصرت امین» سیمه کې هغه مهال رامنځته شوه چې یو موټر له سړک واوښت او د «ګوهرګان» سیند پرېوت.
د سلاموطندار پښتو فېسبوکپاڼه وڅارئ
په مړو شویو کې دوه ماشومان او دوه نارینه شامل دي او موټر چلوونکی ټپي شوی دی.
د نوموړي په وینا، پېښه کې څلور کسان مړه شوي او یو بل ټپي دی. هغه همداراز زیاته کړه چې دغه فیلډر ډوله موټر له ګوهرګان سیمې څخه د پلخمري ښار ته پر لاره و.
دغه پېښه داسې مهال رامنځته کېږي چې پرون پنجشنبه د بدخشان یاوان ولسوالي کې هم د یوې ټرافیکي پېښې له کبله ۱۸ کسان ټپیان شوي دي.
په دې وروستیو کې د هېواد په بېلابېلو سیمو کې ټرافیکي پېښې زیاتې شوي چې مسوولان یې لامل د سرکونو خرابوالی او د موټر چلوونکو بېاحتیاطي بولي.
