په هېواد کې د خوراکي توکو د بیو لوړېدو او وزګارتیا سر هممهاله ګڼشمېر هېوادوالو ته د یوې وچې ډوډۍ پیدا کول هم ستونزمن دي او که په دې کار بریالي هم شي، نهشي کولای چې خپله خېټه پرې مړه کړي.
ورځ تر بلې د وزګارتیا ډېرېدل، د خوراکي او نورو توکو د بیو لوړېدل، د بهرنیو مرستو کمېدل او یا هم درېدل او د امریکا له لوري د افغانستان د شتمنیو کنګل، د دې لامل شوی چې افغانان د یوې وچې ډوډۍ پیداکولو ته هم حیران کړي.
د سلاموطندار پښتو فېسبوکپاڼه وڅارئ
په ورته مهال هېوادوال وايي چې په وروستیو اوونیو کې د وچې ډودۍ وزن هم راکم شوی دی. په همدې حال کې د کابل یو بل اوسېدونکی د بیو لوړېدو څخه په اندېښنې سره وايي، که څه هم عاید نه لري، اوس اړ دی چې د یوې وچې ډودۍ لپاره له څه وړاندې پیسې ورکړي.
نانوایان د وچې ډوډۍ د وزن کمېدل مني، خو لامل یې د اوړو او ګازو د بیو لوړېدل په ګوته کوي. عیسی چې د کابل ښار په یوه څنډه کې نانوايي لري وايي، د افغانیو پر وړاندې د ډالرو بیو لوړېدل او افغانستان ته له بهر څخه د توکو لږ لېږد، د دې لامل شوی چې د وچې ډوډۍ په بیه کې هم بدلون راشي.
نږدې دوه میاشتې کېږي چې اسلامي امارت په بشپړه توګه پر افغانستان ولکه خپله کړې چې په دې موده کې د هېواد اقتصاد د پاشلو له ګواښ سره مخ دی او ورځ تر بلې بېوزلي او وزګارتیا د زیاتېدو په حال کې ده.
