د ا.ا د سرپرست حکومت د بهرنیو چارو وزارت د فلسطین په اغوار سیمه کې د اسراییلو له لوري د نویو ښارګوټو جوړولو غندلي دي.
د سلاموطندار پښتو فېسبوکپاڼه وڅارئ
دغه وزارت په یوه خبرپاڼه کې لیکلي: «د صهیونیستي رژیم وروستي اقدامات نړیوالو قوانینو، په تېره بشردوستانه نړیوال قانون ته د دغه رژیم د غاړې نه اېښودو ښکارندويي کوي. د ورته یواړخیزو اقداماتو او د فلسطین د خلکو پر حقونو د سترګې پټولو دوام به د وضعیت د لا ترینګلتیا لامل شي.»
د دغه وزارت په وینا، ا.ا له نړیوالو لوبغاړیو، په تېره د سیمې له اغېزناکو مسلمانو هېوادونو غواړي چې د فلسطین د مظلومو خلکو د ملاتړ په برخه کې خپل قانوني، انساني او اخلاقي مسوولیت سر ته ورسوي او پر «اشغال شویو ځمکو» د ناقانونه ښارګوټو جوړولو مخه ونیسي.
