د ریاستالوزرا اداري او دویم مرستیال عبدالسلام حنفي نن یکشنبه د مرغومې څلورمه کابل کې یوې غونډې ته د وینا پر مهال ویلي چې د سوداګرو او پانګوالو د تېرو کلونو د مالیاتي سرغړونو جریمې د دوی د هڅونې او د هېواد اقتصادي پرمختګ په موخه بښل شوي دي.
عبدالسلام حنفي چې نن ارګ کې د «مالي جریمو معافیت د صنعت او سوداګرۍ ملاتړ» په نوم غونډه کې خبرې کولې له سوداګرو او پانګوالو وغوښتل چې خپلې مالیې پر ټاکلي وخت ادا کړي.
نوموړي وویل: «اسلامي امارت د سوداګرو او پانګوالو د تېرو کلونو مالیاتي سرغړونو جریمې بښلي او له دې وروسته که څوک مالیاتي جریمې ورنه کړي، له قانوني چلن سره به مخ شي.»
بلخوا د سوداګرۍ او پانګونې خونې مرستیال محمدیونس مومند له اسلامي امارت څخه غواړي چې د سوداګرو او پانګوالو ستونزو ته د رسېدنې په موخه دوه اړخیزه کمېسیون رامنځته کړي.
نوموړي وویل: «د ولایتونو د سوداګرو کارونه باید په خپلو ولایتونو کې حل شي، خو د یوه کوچني کار لپاره مرکز ته راغوښتل کېږي او سرګردانه وي، موږ له اسلامي امارت غواړو چې د سوداګرو او پانګوالو د ستونزو حل په موخه دوه اړخیز کمېسیون رامنځته کړي.»
په ورته مهال د اقتصادي چارو یوشمېر کارپوهان د مالیاتي سرغړونو جریمې په بښلو سره وايي، دا کار د اقتصادي پرمختګ او د پانګوالو د هڅونې سره مرسته کوي.
د اقتصادي چارو کارپوه تاج محمد تلاش وویل: «د سوداګرو او پانګولو د مالیاتي سرغړونو بښل نېک اقدام دی او باید دا چاره دایمي نهشي.»
سلاموطندار پر ټویټر هم وڅارئ
د یادونې وړ ده چې د ګمرکونو عمومي ریاست له سوداګرو او پانګوالو څخه غوښتي، هغه کسان چې د تېر یوه کال پر مهال یې د مالیاتي سرغړونو جریمه مالیې وزارت ته ورکړې، بېرته دې ترلاسه کړي.
